Chenna in nei lote dinhmun zir chiang

Khawpui chhunga chenna in nei lote dinhmun zir chiang tura Supreme Court-in a din, Committee on Shelter for Urban Homeless (SUH) chuan an chairman, Justice Kailash Gambhir hoin Ningani khan Aizawl an rawn thleng a; sorkar official-te nen an inkawm bakah, nimin khan Aizawla home hrang hrang an tlawh.

Committee on Shelter for Urban Homeless (SUH) member-te hian Ningani tlai khan Secretariat conference hall-ah department hrang hrang hotute an kâwm a; SUH chairman Justice Kailash Gambhir chuan, sorkar leh tlawmngai pawl thawhhona leh chanhaite tana an inpekna lawmawm a tih thu sawiin, "Sorkar chauh ni lo, mipui mimirin chanhaite leh mi harsa zawkte tana inpek hi kan mawhphurhna a ni," a ti.

Department hotute nen an inkawm zawhah chief secretary Lalmalsawma chu a pisaah an kâwm bawk a; Mizorama chenna in nei lote dinhmun an sawipui.

Sorkar hotute nen an inkawm zawhah Motherless Baby Home, Khatla; Gan Sabra, Luangmual West; Aizawl Shelter Home, ITI leh CPD Transitional cum Children’s Home, Saron Vengte an tlawh a ni. Nimin khan TNT, Muanna Veng leh Hermon Children Home, Durtlangte an tlawh leh bawk.

Justice Kailash Gambhir chuan, sorkar, NGO, mimal leh tlawmngai pawlte'n ṭanpui ngaite chawikanna tura an hnathawh ropui a tih thu a sawi a; home enkawltute chu an duhthusam loh lai leh tlâkchham an neihte dan ang thlapa ziaka sorkar hotute hnena thehlut turin a chah.

SUH member-te hian nimin vêk khan Mizoram an chhuahsan a ni.