MNF-in martarte ruhro Aizawlah an la

MNF party chuan nimin khan Mizo Hnam Rûnah martar mi pangate ruhro hmuahna inkhawm an hmang a; MNF presi­dent Zoramthanga chuan, Pathian leh ram tana an nunna hlântute chu MNF-in thinlung takin a chawi­mawi a, a zah tih a sawi.

Zoramthanga chuan, martarte chu an zah tih sawiin, "Martar-te thih chhan, he ram malsawmna kungpui hi Pathianin martar chhungte leh Zo fate zawng zawngte tan a sawi ṭîl dawn. Zoram malsawmna lo thleng tur chu Zofate hian beidawng loin i nghak ang u," a ti.

Martar mi panga ruhro an hmuahte chu - Lalrin­liana s/o Aizika, Ngopa; Thanseia s/o Liana, Sawleng; Lalhmingliana s/o Zaluta, Kawlkulh; Kapzawna s/o Rosua, Kawlkulh leh, Romawia s/o Bawihchhuana, Zanlawnte an ni.

An vai hian Thei­chang­bung khaw ram, North Hlimen bul, Kolasib district aṭanga lak a ni a; Ningani zanah Kolasib Ṭumpui YMA Hall-a tlaivarpui a nih hnuah nimin khan Aizawla Mizo Hnam Run thlenpui an ni.

Lalrinliana, Thanseia, Lalhmingliana leh Kap­zawna te chu July 11, 1968-ah Theichangbung thlawhhmaah India sipaite'n an kap hlum a; an ruang chu sipaiin khuaa lak luh an phal loh avangin ramah phûm a ni. Romawia erawh chu April 23,1968-ah Theichangbung khua­­ah kahhlum a ni a, Thei­changbung thlàn­mualah phum a ni thung.