Aizawlah hmai tuamna vuah lo an tam

Tunlai hian Mizoram Police hnuaia Flying Squad chuan Aizawl hmun hrang hrangah The Mizoram (Containment and Prevention of COVID-19) Ordinance, 2020 bawhchhia an vai ṭhin a, hmai tuamna (mask) vuah lo mi tam tak an man tawh.

Police-te hian July 14 zing dar 9 aṭanga July 15 zing dar 9 inkarah ringawt hmai tuamna vuah lo mi 978 an man a, Covid Ordinance angin Rs. 100 an chawitir nghal ṭhin. July 14 zing dar 9 aṭanga July 15 zing dar 9 inkarah vêk hian social distancing zâwm lo mi 31 an man a, Rs. 200 zel an chawitir a ni.

Vanglaini palai zawhna chhangin Flying Squad duty-te chuan, hmai tuamna vuah loa veivâk an tam thu sawiin, "Ṭhenkhat chuan duty min hmuh veleh hmai tuamna an vuah a, ṭhenkhat chuan an khabeah an dah. A zawng zawng kan páwng man ngawt lo a, ṭhenkhat chu vuah tura hrilhte kan nei. Khabea vuahte pawh vuah ṭha turtein kan ti 

ṭhin," an ti.