Swab sample 17,158 endik tawh

Mizoram aṭangin July 14, Thawhlehni tlai dar 5 thleng khan Covid-19 vei leh vei loh hriat nan swab sample 17,158 endik a ni tawh a, chu'ng aṭang chuan hripui vei mi 238 an awm.

Health Services hnuaia Integrated Diseases Surveillance Programme (IDSP) chhinchhiah danin, Thawhlehni tlai dar 5 thlenga sample endik tawh zat chu 16,914 a ni a, mahse, Thawhlehnia Zoram Medical College (ZMC) Covid-19 Laboratory-a sample endik 224 leh Lunglei Civil Hospital (LCH) laboratory-a Truenat-PCR hmanga endik 30 nen 17,158 a ni.

Mizoram aṭanga swab sample endik hmasak ber chu February 5, 2020 khan Kolkata-a National Institute of Cholera and Enteric Diseases (NICED)-ah tih a ni a, NICED-ah hian Mizoram aṭangin sample panga endik niin, Covid-19 vei hmuh a ni lo. 

Guwahati Medical College laboratory-ah sample endiktir leh ṭhin niin, sample 12 endiktir a ni a, Mizorama Covid-19 vei hmasa ber Rev. VL Hruaia Khiang­te-in a vei tih March 24-ah hmuh chhuah a ni. Mizoram sorkarin thlawhtheihna a tihtawp avangin Silchar Medical College-ah swab sample thawn leh niin, sample 41 endiktir a ni.

April 7 aṭangin ZMC-ah Covid-19 Laboratory hman ṭan a ni a, Mizo­ramah Covid-19 vei thla hnih chuang hmuh belh a nih loh hnuah leh ZMC-a a vawi khat nan June 1 khan hripui vei mi 12 hmuh chhuah a ni. ZMC laboratory-ah hian sample 16,467 endik tawh niin, July 14 thleng khan Covid-19 vei mi 226 hmuh chhuah a ni tawh.

Lunglei Civil Hospital (LCH) laboratory-ah Truenat-PCR hmangin sample 643 endik a ni tawh a, Covid-19 vei mi 11 hmuh chhuah tawh a ni. Hetih lai hian, Mizoram luhka hrang hranga medical screening point-ah July 14 tlai dar 5 thleng­a enfiah (screen) tawh zat chu 1,33,336 an ni a; rapid antibody test (RAT) hmangin 16,661 endik a ni tawh bawk.