Nungcha, thing leh mau tichhe lo turin MP-in NH kawngpui siamtute a hrilh

Lunglei District Development Coordi­nation and Monitoring Committee (DISHA) chu an chairman C Lalrosanga, Lok Sabha MP kaihhruaiin nimin khan an ṭhukhawm. MP chuan, NHIDCL hotute chu kawngpui laih vanga environment tihchhiat a nih loh nan environmental law-te uluk taka zâwm turin a hriattir.

C Lalrosanga chuan, DISHA chu sorkar laipui scheme pawimawh zawng zawng thlirhona leh zirchianna a nih avangin ram hmasawnna atan a pawimawh thu a sawi a, "Sorkar laipui hotute pawhin an ngai pawimawh tak zet. Kan ram tihmasawn zel turin sorkar hnathawk te, tlawmngai pawlte leh khawtlang hruaitute'n mawhphurhna sang tak kan nei ṭheuh a ni," a ti a, thâ thlah loa theihtawp chhuah zel turin a chah.

Ṭhutkhawmah hian Lunglei district-a NH-54 leh NH-302 kawngpui siam hna thawktu National Highways and Infrastructure Development Corporation (NHIDCL) hotute koh tel an ni a; MP chuan, kawngpui an laihna leivûngte a paihna hmun tura ruatah chauh paih tur leh leivûngte chu kawr leh luiah a luh loh nan a ṭul anga hma la turin a hrilh.

C Lalrosanga chuan, "National highway siam mekte hi kan ram economy ṭhan len zel nan an pawimawh tak zet rualin, kawngpui laih avanga environment tihchhiat a nih loh nan environmental law-te uluk takin zâwm ang che u," a ti.

Lunglei district DISHA member secretary Kulothungan A, bawrhsap pawhin thu sawiin, NHIDCL-in kawngpui an laih mekah EFCC department nen ṭang dunin Quality Monitoring Committee an din thu leh joint verification an neih chhoh mek thu a sawi.

DISHA meeting-ah hian Lunglei district-a thlan tlin MLA pathum - Zodintluanga Ralte, Nihar Kanti Chakma leh Lawmawma Tochhawng bakah, DRDA project director M Misael, sorkar hotu te, BSNL, NHIDCL, VC, YMA leh MHIP aiawhte an tel a ni.