Lungleiah Education Complex hawng

Chief minister Zoram­thanga chuan nimin khan Lungleiah School Education Complex leh MBSE Regional Office a hawng. In sakna atan hian Ministry of Deve­lopment of North Eastern Region aṭangin Non Lapsable Central Pool of Resources (NLCPR) hnuaiah cheng nuai 1,040 hmuh a ni.

CM Zoramthanga chuan, ram leh hnam hmasawnna leh zirna chu kal kawp tlat a ni tih sawiin, "Zirna hi kan eizawnna leh hnathawhna mai bakah, khua leh tui ṭha, mi pangngaia min siamtu a ni. Pathian ropuizia tarlan nan leh amah chawimawi nan kan hman thiam a ṭul," a ti a; zirna hmasawnna ruhrel tharte chu neitu rilru púa duat taka enkawl turin mipui a sáwm.

Khualzahawm, School Education minister Lal­chhandama Ralte pawhin thu sawiin, "Zirna hmasawn­na turin Mizoram mipuiin ṭhahnem an ngai a, tun hnaiah public participation a ṭha em em. Sorkar sikulah enrolment a pung hi a lawmawm tak zet," a ti.

Lunglei School Educa­tion Complex leh MBSE Regional Office-te hi LB Associates, Aizawl sak a ni a; School Education Complex atan cheng nuai 800 leh MBSE Regional Office atan nuai 240 hman a ni. Hawnnaah hian Lok Sabha MP C Lalrosanga, Lunglei HPC vice chairman Lawmawma Tochhawng leh MLA hlui Joseph Lalhimpuia leh mi pawimawh dangte an tel a ni.