NHM-a thawkte chawlh lâk tum pawi ti Cabinet agenda kan la ni ngai lo - NEUM

Health & Family Welfare depart­ment chuan thuchhuah siamin, National Health Mission (NHM) hnuaia thawkte'n NHM Emplo­yees Union, Mizoram (NEUM) huaihawta July 11-13, 2022 chhung a huhoa chawlh lâk an tum chu pawi an tih thu a tarlang. Hetih lai hian NEUM chuan, an thil phûtah Cabinet meeting agenda-ah an la lang ngai miah lo tih an sawi.

HFW department chuan, NHM hnuaia thawkte harsatna chu kum 2019 aṭangin HFW-in a hriatpui a, sorkarah a thlen tawh ṭhin nia sawiin, "Sorkar pawhin ngai pawimawhin NHM employee-te leh department hrang hranga CSS/EAP hnuaia thawkte dinhmun zir chiangtu tur committee a din tawh a, study report hi sorkarah thehluh tawh niin, uluk taka zir chianga ngaihtuah mek a ni," a ti.

NHM hnuaia thawkte dah ngheh chungchangah HFW department chuan, NHM hnuaiah thawktu mi 2,000 chuang an awm mek tih a tarlang a, "Anmahni ang thoa CSS/EAP hnuaia thawk department hrang hrangah mi ṭhahnem tak an awm mek avangin ngun taka ngaihtuah ngai thil a ni a, vawi leh khata tihpuitlin mai theih chi a ni lo," a ti a; zir chianna report ngaihchàn mek a nih thu a tarlang.

HFW tarlan danin, NEUM hruaitute chu an thil phût leh nawrh tum chungchang nimin tlai dar 3 khan Health Secretary leh department hotu dangte'n an sawi­pui. Sorkarin hma a lak mek avang leh study group report ngaihtuah mek a nih avangin mass casual leave lâk an tum chu ṭhulh rih turin an ngen a ni.

Health department thuchhuah chuan, "Sorkarin ngawrh taka hma a lak mek lai leh department hotute'n tih tak zeta an ngenna ngai pawimawh loa NEUM-te’n nawrh kaltlangpui an tum hi HFW department chuan pawi a ti tak zet a ni," a ti.

NEUM chuan nimin khan thuchhuah siamin, an harsatnate vawi tam tak sorkarah an thlen tawh ṭhin tih sawiin, "Hengte hian tun thlengin awmzia a la nei lo mai ni loin, vawi khat tal pawh Cabinet meeting agenda-ah kan la lang lo," an ti a, hriatthiam harsa an tih thu an tarlang.

NEUM tarlan danin, NHM hnuaia thawk zinga ṭhenkhat chu kum 15-20 chuang thawk tawhte an ni a, hun rei tak aṭang tawhin sorkarah a ngheta an luh dan tur siamsak turin an ngen tawh ṭhin. An thil phût tlangpui chu - medical reimbursement neih ve, Health department hna lakah NHM-a thawkte tan eng emaw zat hauhsak leh transfer TA/DA neih vete a ni.

Health department tarlan danin, HFW department bik chu IFMIS-ah mapping felhlel a awm avangin Treasury-ah bill thehluh theih a ni lo a, chu vang chuan IFMIS hmang lo tura dilna Finance department-ah dil niin, June 21, 2022-ah phalna hmuh a ni. Administrative department-in June 22-ah HFW Principal Director a hriattir a, NHM hnuaia thawkte April leh May thla hlawh lâkna tur bill chu June 24-ah Treasury-ah thehluh a ni.

NHM tana sum pek tur Rs 8,04,27,000 chu Finance-in June 27-ah Treasury aṭangin a chhuah a, June 29-ah Rs 3,86,73,000 pek chhuah leh tura tih a nih laiin Treasury office khawl a chhia a ni. Khawl chhia chu July 5 zanah siam ṭhat a ni a, July 6-ah Treasury aṭangin sum pek chhuah a ni. June 2022 hlawh tur pawh a hun taka pek a nih theih nan buaipui mek a nih thu tarlan a ni bawk.