Mamit District MJA-in Zamuang an tlawh Kuhva chíngtute'n an harsatna an lo hrilh

Mamit District MJA member-te chuan nimin khan an president C Lalramdinzela hoin Zamuang an tlawh a, kumin June 28 leh July 6-a Myanmar aṭanga kuhva lak luh man leh hâl kaihhnawihah thil awm dan an enfiah. Kuhva chíngtute chuan an harsatna tawhte MJA member-te an lo hrilh.

Mamit MJA-te dawngsawngtu Hachhek Bial Kuhva Chingtu Pawl (HBKCP) hruaitute sawi danin, Zamuang khua hian kum 2021 khan kuhva aṭangin cheng nuai 579 vel an hmu a, kuminah cheng nuai 600-700 man thar an inbeisei. Zamuang khuaa chhungkaw tam berin eizawnna atan kuhva an hmang a, tlang ram loneih an bànsan tawh a ni.

Kuhva tharte hralh turin kum tin May-June thlaah inremna ziah a ni ṭhin a, Zamuang kuhva chíngtute chuan agreement form siamin an pe chhuak ṭhin. Tunah erawh chuan ram dang kuhva a kal reng avangin agreement siam pawh cheng nuai thum man hnuai lam a ni tlangpui a, nuai thum chung lamah agreement siam a la ni lo.

Ram dang kuhva dan loa lak luh a nih avangin Assam state-ah harsatna an tâwk ṭhin a, chu chuan kuhva thar chhuah a nghawng avangin a hralhnaah harsatna an tâwk a ni.

HBKCP-ah hian khaw 11-a kuhva chíngtute an awm a; kum 2021 khan cheng nuai 2,741 man an thar. Kuminah cheng nuai 3,000 chuang lak luh beisei a nih laiin, ram dang kuhva a kal zel chuan an beisei a pha lo turah an ngai a ni.