MJA President-in ZDF policy a tlangzarh

Zoram Decentralization Front (ZDF) policy thar chu nimin khan Mizoram Journalists' Association (MJA) Gen.Hqrs president C Lalrambuatsaiha'n Synod Conference Centre-ah a tlangzarh.

C Lalrambuatsaiha chuan, Mizoram chu chhe hle tawh mahse siamṭhat theih a la ni tih sawiin, "Chhan theih a la nih lai hian siamṭha tura ke kan pên a ngai. Ram siamṭha turin hruaitu ṭha leh mipui ṭha an pawimawh vek rualin, ram hruaitute an pawimawh hmasa a, ram hruaitute an dik hmasak chuan mipuite'n kan zawm mai ṭhin. Lui pawh a hnár a fîm chuan a mawng lam pawh a fím mai a ni," a ti.

MJA President chuan, hnam ropuia Mizo hnam din tur chuan tam a ngai tih sawiin, "Mizote hi Mizoram chhung leh páwna mite nen vek nuai 30 vel emaw kan ni a, kan tlem lutuk hi kan ṭhanmawhbáwk a ni," a ti a; Mizote tan kut themthiamna (skill labour) lamah ṭan lak a ngaih thu a sawi bawk.

ZDF president Lawmthanga chuan, an pawl chu April 2, 2011-ah din a nih thu sawiin, an thil tum zingah Constitution siamṭhat vawi 73-na anga thuneihna sem zâi te, Mizoram intodelh tura hmalak leh dan lalna rama siamte chu an tum langsar a nih thu a sawi.

Tlangzarhnaah hian Rev. B Sangthanga'n ZDF policy thlir lâwkna hun a hmang a; Rev. Liandawla leh Wg Cdr Lalnghinglova ten ZDF policy an sawifiah a ni.