Vaivakawna flyover siam dan tur enfiah

Minister of state Lalruatkima hoin nimin khan sorkar hotute'n Vaivakawn kawng pengṭhuama kawng chhâwng (flyover) siam dan tur leh ram/hmun lâk tur leh ram a tihchhiat turte an enho. Minister chuan, hmasawnna ruhrel ṭha zawk nei turin ram ṭhang zel mila hmasawnna kalpui a ṭul thu a sawi.

Kawng chhâwng siam dan tur enhonaah hian, PWD-in feasibility report an siam tawh aṭanga hmun lâk tur leh ram tihchhiat tur enfiah a ni. Ruahman chhin danah chuan, Zohnuai aṭanga Temple Square pan chhohna chu bazar kâwn aṭanga kal chho tura siam a ni ang a, mimal ram leh inte lâk a ngai nual dawn a ni.

Ruahman chhinna chu Mizoram sorkarin inremna a ziahpui Telecommunications Consultants India Ltd (TCIL)-in an bawhzui ang a, TCIL chuan sorkar laipuiah sum mamawh tur dilin hma an la ang.

Hmun enfiahnaah hian bialtu councillor Lalfakzuala, adviser to chief minister (Technical) K Lalsawmvela, PWD engineer-in-chief Bowmen, TCIL consultant-te leh Vaivakawn khawtlang hruaitute an tel a ni.