Hmun 75-ah thing phun rûnpui

Environment, Forest & Climate Change (EFCC) department chuan India zalenna kum 75 lawmna, Azadi Ka Amrut Mahotsav pualin nimin khan Mizoram hmun 75-ah thing phun rûnpui an buatsaih.

Aizawlah chuan EFCC minister TJ Lalnuntluanga hoin Pachhunga University College-a City Forest-ah thing phun a ni a; thing phunna inkhawm chu EFCC principal secretary Jitendra Kumar-a'n a kaihruai a, thing ṭiak 75 phun a ni.

Inkhawma tarlan danin, EFCC department chuan Mizoram district khawpui tinah City Forest Project nei turin hma a la a, tunah hian Aizawl leh Champhaiah City Forest siamna turin sorkar laipui aṭangin sum a dawng tawh.

Champhaiah pawh Zotea Nagar Van hmunah district bawrhsap James Lalrinchhana hoin thing phun hnatlang huaihawt a ni a, thing ṭiak 2,000 phun a ni. Tlangsam, Hmun­hmelṭha leh Zote rama NEC Plantation Site-ahte thing ṭiak 1,030 phun a ni bawk a, mi 185 an hnatlang a ni.