Kuhva chíngtute harsatna chingfel thuai turin ZPM-in sorkar an phût

ZPM party chuan, Mizoram chu dan loa thil ti ṭhinte nuam ti taka an tuallênna ramah a chang ta nia sawiin, hriatthiam har an tih thu, thuchhuah siamin an tarlang a; kuhva chíngtute harsatna tawh mek chu a rang thei ang bera chinfelsak turin Mizoram sorkar an phût.

ZPM chuan, July 7, Ningani khan Zamuang dáiah ram dang kuhva dan loa lak luh nia hriat a vawi hnihna atan mana hâl a ni tih sawiin, "Dan loa kuhva tawlh rûk a la reh lohzia leh sorkarin tihtawp tumna tak tak a neih lohzia a tichiangah kan ngai. Kan sorkar hrawn mek hnuaiah Mizoram chu dan loa thil ti ṭhinte nuam ti taka tuallênnaah a chang ta mai hi hriatthiam har kan ti a, hnam angin a mualphothlak a, a zahthlak a, a rilru natthlak tak zet a ni," an ti.

Ram dang nena insumdawn tawnnaah tualchhung kut hnathawktute humhalhna dan fel tak a awm tih sawiin ZPM chuan, "Dan loa kuhva tawlh rûk hi Mamit district-a kuhva chíngtute tan chuan chaw bél inben buaksak ang a ni," an ti a; mahni kutkawiha dik taka dinchhuah tumte thla a ngam thei lo te, dan rorelna tlâkchhiatna ram ang maia kuhva tawlh rutute an khawsa chuan mipui rilru a tihnat thu an sawi.

ZPM chuan, Hachhek Bial Kuhva Chingtu Pawl, Hachhek Joint VC, Taitesena Group YMA, Langkaih Group YMA leh mi ṭhahnemngaite'n theihtawpin dan loa kuhva tawlh rûk tihtawp a nih theih nan sorkar hruaitu lu, Chief Minister thlenga hma an lak tawhnate'n awmzia a nei lo tih an sawi a, "Sorkar hian kut hnathawktute a ngaih pawimawh lohzia a chiang hleah kan ngai," an ti a; Hachhek biala kuhva chíngtute harsatna chingfel thuai turin sorkar an phût a ni.