2020-21 atana VC-te hman tur sum Vbc. 93 pek vek a ni tawh - LAD Minister

Local Administration department (LAD) chuan an minister K Lalrinliana hoin nimin khan SIRDPR Conference Hall-ah LAD review meeting an buatsaih. Minister chuan, 15th Finance Commission Grant kaltlanga VC-te hman tur XVFC 2020-21 atana cheng vbc. 93 hmuh chu VC-te hnenah pek vek a nih tawh thu a sawi.

K Lalrinliana chuan, 15th FC kaltlangin VC-te'n khawtlang mamawh hrang hrang siam nan XVFC 2020-21 chhung atana hmuh cheng vbc. 93 chu VC-te hnenah pek vek a nih tawh thu leh hna tam zawk thawh tawh a nih thu a sawi a, "Kum 2021-22 atan cheng vbc. 69 dah a ni a, Central kalphung thar angin 2021-22 aṭang chuan state treasury aṭangin VC account-ah direct-a lut tawh tura tih a ni. VC account eng emaw zatah a lut tawh a, a bak chu kumin sorkar kum 2022-33 chhunga hman turin Finance-ah revalidation dil mek a ni," a ti.

Minister chuan, Excluded Area Grant-ah kum 2018-19 khan cheng vbc 45.44 leh kum 2019-20 khan vbc. 16.24 dawn a nih thu sawiin, "Sumte hi K Deposit-ah eng emaw chen dah a nih hnuah tun hnaiah vbc. 5 hman phalna pek kan ni a, la release bakte pawh hmu thuai thei tura hmalak mek a ni bawk," a ti a; RGSA scheme hnuaiah VC in thar 10, thawm ṭhat tawh pasarih leh thawm ṭhat mek 95 leh VC 193 hnenah computer pek a nih tawh thu a sawi.