Dan loa ram dang kuhva tawlhtute man turin HCDC-in sorkar an ngen

Hachhek Constituency Development Committee (HCDC) chuan thuchhuah siamin, dan loa Myanmar aṭanga lak luh kuhva rah hmanga sumdawnna kalpuitute leh an thurualpuite zawng zawng a rang thei ang bera man tur leh an phû tâwka hrem turin Mizoram sorkar an ngen.

HCDC chuan, Hachhek Bial Kuhva Chingtu Pawl (HBKCP)-in June 6, 2022-ah chief minister Zoramthanga hnenah dan loa ram dang kuhva Mizorama lut ṭhin titawp tur leh June thla chhung ngeia dan loa kuhva sumdawnna kalpuitute man tur leh hrem tura ngenna an thlen tawh tih an tarlang a, "Mizoram sorkarin hma a lak ngei pawh kan rin laiin tun thlenga dan loa kuhva sumdawnna kalpui zel a la ni hi hriatthiam har kan ti hle," an ti.

Kumin June 28-ah HBKCP-te'n ram dang kuhva ip 285 an man a, July 7-ah ip 300 an man leh tih sawiin HCDC chuan, dan loa kuhvaa sumdawnna kalpuitute chu Mizoram sorkarin a thurualpui nia an ngaih thu an tarlang.

HCDC chuan, "Kan sorkar hian dan loa sumdawnna kalpuitute a thurualpui lo a nih chuan dan loa sumdawnna kalpuitute leh an thurualpuite zawng zawng a rang thei ang bera man chhuak a, an phú tâwk hremna pe ngei turin sorkar kan ngen tak meuh. Kan bial chhung hi dan loa kuhva tawlhna kawnga hman kan phal lo tih min hriatsak turin kan ngen bawk," an ti.

Dan loa ram dang kuhva tawlh chungchanga HBKCP leh Hachhek biala tlawmngai pawlte hmalakna chu an thlàwp tlat thu HCDC chuan an tarlang bawk.