Kawnpui Field-a phûl lem phah tur lungphùm SYS Minister-in a phúm

Sports & Youth Services minister Robert Romawia Royte chuan nimin khan Awithangpa Hall-ah Kawnpui Field No. 2 zauh leh phûl lem phah hna ṭanna tur lungphùm a phúm.

SYS Minister chuan, Tuirial bial MLA by-election campaign lai, November 2, 2021 zinga Kawnpui Field-2 hmuna phûl lem phah an intiamna Chief Minister zara tihhlawhtlin a ni dawn chu lawmawm a tih thu a sawi a, "CM Pu Zoramthanga kaihhruai sorkarah hmun hrang hrangah hmasawnna tam tak a awm mek. SEDP Phase-I hmangin chhungkua 60,000 chuangin hmasawnna rahbi thar an tuk chho ṭan dawn a, Phase-II pawh sem chhunzawm a ni ang," a ti.

National Integration Policy 2020 angin zirna leh infiamna kal kawppui thiam a pawimawh thu sawiin Robert Romawia chuan, phûl lem phah thar tur pawh zirna-in hrang hrangte'n ṭangkai taka an hman phalsak a nih tur thu a sawi a; Kawnpuia Hockey Academy chu Khelo India Scheme aṭangin Hockey Centre of Excellence atan thlan a ni a, tihphuisui tum a nih thu a sawi bawk.

Lungphûm inkhawm hi SYS secretary Dr Lalrozama'n a kaihruai a, bialtu MLA K Laldawngliana pawhin thu a sawi.

Sorkar thuchhuah tarlan danin, khelmual zauhna leh phûl lem phahna atan hian cheng nuai 600 hmuh a ni a, Finance Ministry hnuaia Central Assistance to State for Capital Expenditure aṭangin February 2022-ah sanction hmuh a ni.