Hripui vei enkawl mek an pung tial tial

July 7, Ningani khan Mizoramah Covid-19 vei mi 108 hmuh chhuah a ni a, enkawl mek zat an pung tial tial. Nimin khan hripui vei dam tawh mi 33 chhuahtir an ni a, Covid-19 vanga thi an awm lo.

Ningania Covid-19 positive hmuh thar mi 108-te chu mipa 48 leh hmeichhia 60 an ni a, ZMC laboratory-a hmuh chhuah mi pahnih leh Rapid Antigen Test hmanga hmuh chhuah mi 106 niin, positivity rate 24.11% a ni.

Champhai district-ah mi paruk hmuh thar a ni a, June 22 aṭanga hripui laka an fihlîm hnua positive an awm lehna hmasa ber a ni.

IDSP record angin, Mizoramah Covid-19 vei 2,29,609 hmuh chhuah a ni tawh a, mipa 1,06,878 leh hmeichhia 1,22,731 an ni a, mipa aiin hmeichhia 15,853-in an tam zawk. Nimin tlai dar 5 thleng khan mi 2,28,439 (99.49%) chhuahtir an ni tawh a, mi 706 (0.31%) thi tawhin, enkawl mek mi 464 (0.20%) an awm.

Kum 2011 chhiarpuia mihring awm zat aṭanga chhûtin Mizorama Covid-19 positive hmuh tawh zat 2,29,609 chu 20.93% a tling.

Nimin tlai dinhmun angin, Mizorama district 11 zingah Covid-19 positive awm tawh rih lohna pahnih - Siaha leh Lawngtlai district-te chauh an awm leh tawh. Positive active case tamna ber Aizawl district-ah pung zelin, mi 249 an awm tling leh tawh a, Lunglei district-ah 91 an awm bawk.