KHAWTHLIR

Thisen pe
Nimin khan KṬP, Vairengte Bial chuan an khuaah Kolasib District Hospital tan thisen unit 36 an pe a, petute mipa 25 leh hmeichhia 11 an ni. LIKBK Ṭhalai Pawl, Lungzarhṭum Bialin Siaha District Hospital tan thisen unit 20 an pe bawk a, petute mipa 18 leh hmeichhia pahnih an ni. Champhai Bethel Venga Chhura Hmun Welfare pawhin Champhai District Hospital-ah thisen unit 15 an pe a, petute mipa 14 leh hmeichhia pakhat an ni.

Heroin man
Zokhawthar police-te chuan July 7, Ningani khan Hrangkapthuan (30) s/o Saliandum, Tuilum, Myanmar hnen aṭangin Zokhawthar-Hruaikawn kawngah heroin gram 270 an man. Heroin hi international market-ah cheng nuai 135 hû a ni.

Kawlphetha awm dawn lo
Power & Electricity department chuan vawiin zing dar 9 aṭanga tlai dar 4 thleng Maumual sub-station-ah hna an thawh dawn avangin power supply an titawp dawn a; Chaltlang Lily Veng, Bawngkawn, Ṭhuampui, Hunthar Veng, Edenthar Veng, Vaivakawn, Chawnpui leh Zotlang veng ṭhenkhatah power supply a awm dawn lo.

Mock drill
Aizawl District Disaster Management Authority leh Aibawk BDO buatsaihin nimin khan Sialsukah lirnghing a thlena chêt dan tur a taka inzirtirna, mock drill neih a ni.

Kuhva rah man
Sairang police-te chuan July 7, Ningani zan khan truck pakhat aṭangin kuhva rah ip 60 an man. Kuhva rah hi Zoliani d/o Vanlalvuana, Ramhlun North, Aizawl ta nia hriat a ni a, Champhai kudam pakhat aṭanga Vairengte panpui laiin man a ni. Police-te chuan kuhva rahte chu Customs department hnenah nimin khan an hlân.

HIV/AIDS inzirtir
Lawngtlai DC, UDPA, NTCP leh MSACS-te chuan nimin khan Central YLA Hall-ah Lawngtlaia sikul paruka zirlaite pualin vaihlo ṭhat loh dan leh HIV/AIDS chungchang inzirtirna an buatsaih. Zirlaite chuan CYLA Hall aṭanga an sikul thleng kawngpui sira plastic bawlhhlawhte an chhar fai nghal a ni.