Kolasib District MJA leh kuhva chingtute an inkawm ; CM leh sorkar hmalakna hriat tur a awm lo - HBKCP

Kolasib District MJA-te chuan July 9, Inrinni khan kuhva chingtute harsatna hriat tumin Hachhek tlangdung an tlawh a, Hachhek Bial Kuhva Chingtu Pawl (HBKCP) te nen Zamuang­ah an inkawm. HBKCP-te chuan kuhva tawlhruk chungchangah hmala turin ngen mah se, Chief Minister leh sorkar hmalakna hriattur a la awm loh thu an sawi.

HBKCP-te'n Kolasib MJA-te hnena an sawi danin, Myanmar kuhva tawlhruk a nihna rei tawh mah se, a tirah chuan lian tham lo te te a ni. Nikum lam khan chawhrualin thla khatah truck lian trip 50 aia tam a kal a, Tripura kaltlang pawha luhpui an awm.

A hnuah Jampui tlangdunga kuhva neite pawhin harsatna an tawk ve leh a, harsatna a awm hnuah an kuhva tharchhuah chu challan in siam chawpin an phur lut leh. Heti taka Myanmar kuhva a rawn luh hma hian buaina an nei ngai lo.

Hachhek bialah hian kuhva variety chi hnih - ṭhal kuhva (India) leh fur kuhva (Assam) chin a ni a, kuhva thawnchhuah kawngah harsatna a awm vang hian nikum khan Mizoram leh Assam state pahnihten inremna an siam a ni. Mamit DC leh Karimganj DC-te'n term neiin inremna an ziak. Agreement hi kumin March thla khan a tawp leh tawh a, agreement hi tihnun leh a awm lo a, harsatna an tawk zui leh.

Agreement term a zawh hnuah fur kuhva an tharte chu Assam lamin phurhluh an phal lo a, Myanmar kuhva-ah ngaihsak an ni. An hralh theih loh vangin tunah hian fur kuhva lawh sa, cheng nuai 50 vel a ṭawih ral tawh.

HBKCP hruaitute chuan an harsatna chinfel sak turin June 7, 2022 khan chief minister Zoramthanga hmuin, lehkha an thehlut tih an sawi a, "CM hi June chhunga kan harsatna sukiang tur leh Myanmar kuhva a rawn luh tawh lohna tura hmalaksak turin kan ngen. Mah se, June thla chhungin CM leh sorkar hmalakna kan hre loa, Myanmar kuhva erawh mipuite'n vawi hnih an lo man," an ti.

An harsatna tawh ang hi Kolasib district-ah an tawk lo nia an hriatthu sawiin HBKCP chuan, "Assam-ah pawh Cachar district-ah Mizoram kuhva phurhluh phal a nih laiin Karimganj district-ah a lut ve thei lo. Hei hi district thuneitute ngaihdan in an loh vangah kan ngai," an ti a, an harsatna chungchangah hian Assam Chief Minister hmuh an tum thu leh Patharkhandhi MLA a hnawk bera an hriat thu an sawi.

Hachhek bialah hian kuhva chingtu khaw 32-ah association din a ni a, helai biala chhungkua 80% vel chu member an ni. Kum 2021 khan ṭhal kuhva cheng nuai 2,741 man tharchhuakin, fur kuhva cheng nuai 300 man vel an thar bawk. Kuminah hian a vaiin cheng nuai 4,000 man vel thar theih an in beisei.