Hruaitu ṭha lo hnuaiah mi ṭha nihin awmzia a nei lo - Duhoma

Aizawl South-I ZPM Block chuan July 9, Inrinni khan BS Farm, Falkland-ah political training an nei a, an hun hmanpuitu ZPM leader Lalduhoma chuan, hruaitu ṭha lo hnuaiah mi ṭha nihin awmzia a nei lo niin a sawi.

ZPM Leader chuan India leh Mizoram mipui thinlungah hruai­tu ṭha duhna a intuh nasa tawh hle tih sawiin, "MNF-ah hian MLA ṭha tak tak an awm laiin, an hruaitu berin a zir loh avângin, hruaitu ṭha lo hnuaiah mi ṭha nihin awmzia an nei lo a ni," a ti.

Tun hmain Mizo­ramah sorkâr thar a pian reng rengin chu sorkar chu sorkâr ṭha a nih beiseina avânga piang a ni ngai lo tih sawiin Lalduhoma chuan, "Sorkâr ding lai kan nin avâng chauha piang a ni," a ti a, tunah chuan mipuite'n sorkar ṭha zawk, mipui sorkar, kalphung thar sorkâr an duh avâng zawkin sorkâr thar din an duh tawh thu a sawi.

Aizawl South-I bialtu MLA C Lalsawivunga chuan, Pathian leh bial mipuite zarah MLA niin ṭum li budget pharh­naah a awmve tawh thu a sawi a, "MLA ka nih hma leh hnuah pawh kut hnathawktute dinchhuahna tur khawp budget-ah engmah dah a ni lo hian ka rilru a tina ṭhin. Hetiang tireh tur hian Mizoramin Chief Minister thar a mamawh tawh a ni," a ti.