Health Minister-in Guwahati-a damdawi-inte a tlawh
Health minister Dr R Lalthangliana chuan July 9, Inrinni khan Guwahati-a Dr B Barooah Cancer Institute (BBCI) leh Guwahati Neurological Research Centre (GNRC) te a tlawh a; Guwahati Mizoram House-a Young Mens Christian Association (YMCA), North-East Region Executive Committee meeting kaihruaiin YMCA la din lohna hmuna din thar zel a nih theih nan task force a din nghal.
Dr R Lalthangliana chuan, BBCI chu Mizoram tan a ṭangkai thu a sawi a,"Mizoram aṭanga cancer vei damlote in lo enkawl ṭhinnaah kan lawm tak zet," a ti a, Mizoramah cancer natna a hluar avangin Mizoram doctor-te tan short term training buatsaih sak tur leh Mizoram in Cancer Superspeciality Hospital a neih theihna turah an ṭangkai theihna zawna pui turin a ngen.
BBCI hotute chuan, Mizo doctor a tam thei ang ber ‘Cancer Care and Management’-a training neihpui an inhuam thu an lo hrilh a; kumin October thla velah Mizoram sorkar nen ṭangdunin ‘One-day Seminar on Cancer Care & Management for North-East States’ buatsaih an inhuam thu an lo hrilh bawk. Dr R Lalthangliana hian BBCI bi-yearly Journal a tlangzarh sak nghal a ni.
GNRC Hospital hotute nen an inkawmnaah Dr Thangtea chuan,"Mizoram in neurology-a mithiam kan tla chham a, in mithiamte puihna Mizoramin a mamawh hle," a ti a; GNRC hotute chuan Minister ngenna angin Mizoram doctor-te tan a thlawna short term training buatsaih an inhuam thu an lo hrilh.
Mizoram sorkar nen ṭangdunin Mizoramah damlo a tam thei ang ber en turin GNRC neurosurgeon-te an tirh tur thu leh GNRC Hospital pantu Mizo mipui ṭanpui ngaite tan bik ṭawng lettu an rawih tur thu Minister hi an lo hrilh bawk.
Dr R Lalthangliana hian Guwahati Mizoram House-a Young Mens Christian Association (YMCA), North-East Region Executive Committee meeting a kaihruai nghal a; YMCA-in chak zawka hma an lak dan tur sawihoin, YMCA la din lohna hmuna din thar zel a nih theih nan task force a din nghal a ni.
Health Minister hi Health & Family Welfare Board vice-chairman Dr ZR Thiamsanga, MLA leh Guwahati Mizoram House deputy resident commissioner Dr Malsawmtluanga Fanchun ten an ṭawiawm a ni.