Aizawlah ruihhlo a tam vangin Lailapur leh Bagha pan an tlem

Tunhnaiah Aizawl leh a chhehvelah ruihhlo a tam avangin, Aizawl leh a chhehvel aṭangin ruihhlo la tura Bagha leh Lailapur pan an tlem phah. Aizawla ruihhlo a vanlai chuan Bagha leh Laila­pur pan hi an tam ṭhin.

Vairengte aṭanga thudawn danin, Vairengte leh an khaw ṭhenawm vela ruihhlo ti ṭhinte chu Bagha leh Lailapur-ah ruihhlo la turin an la kal tho ṭhin a, Aizawl leh a chhehvel aṭang chuan tunhma angin kal an awm tawh lo. Vairengtea Excise & Narcotics depart­ment (END) lam pawhin ruihhlo zawrh tura lak man tur an nei meuh loa, ruihhlo ti ṭhin ṭhenkhatin anmahni tana an lak erawh an man zeuh zeuh.

Tunhnaiah Aizawl khawpuiah ruihhlo, a bik takin heroin a hluar hle a, police leh END-te chuan heroin hi ni tin deuhthaw an man ṭhin a, Champhai leh a chhehvela police leh END duty-te pawhin heroin hi an man ngun hle.

END hotu pakhat chuan, tunhnaia ruihhlo hluar chhan chu Myanmar buaina vang nia a hriat thu sawiin, "Myanmar buaina avangin mipuite'n hnathawh tur an nei loa, sum leh pai an mamawh tho si avangin ruihhloa inhnamhnawih an tam phah niin a lang," a ti.

Aizawlah ruihhlo hluar mah se, a ti an pun phah lutuk lo nia an hriat thu sawiin END hotu chuan, "Kan ruihhlo man tam tak hi thla hnih thum an kawl tawh, hralhna tur an hriat mai lohte a ni ṭhin. Mi tam takin ruihhlo an rawn keng thla a, supply a tam viau laiin, demand a sang thut si loa, hralhna tur hre lawk lo an awm nual," a ti a, supply a tam avangin heroin hralhna man chu nasa taka a tlakhniam thu a sawi.