Hachhek MLA-in a bial mipuite a thlawp

Hachhek bialtu MLA Lalrindika Ralte chuan thuchah ti chhuakin, kuhva tawlhrukna titawp tura tlawmngai taka duty a bial mipui, kuthna­thawktute thawhrimna leh inpekna a chhuan thu a tarlanga, "An hmalakna hi ka thlawp tlat a ni," a ti.

Lalrindika Ralte chuan, June 28 leh July 7, 2022 khan a bial chhung Zamuang khaw daiah kuhva tawlhruk man a nih thu tarlangin, "Heng dan loa kuhva tawlhrukte hi sorkar hnuaia dan leh thupek kengkawhtute man ni loin, tlawmngaia duty kuthnathawktute man a ni. Sorkarin dan leh thupek a kengkawh tur a nih lai a, sorkar check gate paltlanga kuhva tawlhruk, mi tlawmngai duty-te'n an man zawk tlat hi thil kalphung tur a ni lo," a ti a, sorkarin a tih tur a tih loh vanga hetiang thil hi thleng a nih thu a tarlang.

Ramdang aṭanga dan loa kuhva lo lut avanga a bial mipuite'n an kuhva thar hralhna kawnga harsatna an tawk ṭhin chu pawi a tih thu tarlangin Hachhek Bialtu MLA chuan, "A chhan ber chu dan loa kuhva lo lut man duh lo sorkar kan neih vang niah ka ngai. Dan loa ram dang aṭanga kuhva lo lutin a khua leh tuite tan harsatna nasa tak a siam sak tih hi Mizoram sorkar hian min hriat nawn sak se ka duh. A rang thei ang bera kuhva tawlhruk titawp tur leh kuthnathawktute harsatna sukiang turin Mizoram sorkar ka ngen a ni," a ti.