KHAWTHLIR

Thisen pe
Saron Veng Branch YMA chuan an branch diamond jubilee pualin July 9, Inrinni khan Synod Hospital tan thisen unit 41 an pe a, petute mipa 36 leh hmeichhia panga an ni.

Training buatsaih
Lawngtlai district chhunga zirna tih hmasawnna atan Pratham Foundation nen ṭangduna pawl nga aṭanga pawl 12 inkar zirtirtute tana capacity development training ruahman chu a thawh khatna atan Bungtlang 'S' leh Sangau RD Block huam chhungahte kar hmasa chhung khan neih a ni.

Jail aṭangin Tlan chhuak
July 9, Inrinni chhun dar 12:30 - 1:30 inkar vel khan Central Jail aṭangin Isak Lalremruata (28) s/o Lawmzuala, Kananthar, Mamit district leh Zohmangaiha (19) s/o C Vanlalhruaia, Lunglei Ramthar Vengte chu an tlan chhuak. An pahnih hian hmeichhe kumtling lo khawih/pawngsual vanga tang an ni. An tlan chhuah lai hian Isak Lalremruata hian a ban veilamah leh a pumah ser a nei a, Zohmangaiha hian a ban veilamah tattoo leh a hmui hnuaiah khuavang a nei. Anmahni hmu leh an awmna chin hriate chu Special Superintendent mobile phone no. 7085929432 leh Jailer mobile phone no. 9862306783 ahte hriattir tura ngen an ni.

Heroin man
Khankawn Police checkgate-a duty-te chuan July 9, 2022 zan khan Vanrohlua (30) leh Lalremruata (30), Venghlui, Aizawl ve ve nia inchhalte kut aṭangin heroin gram 24 an man. Heroin kawltute hi Champhai PS-ah thubuai siam sak an ni.

ZPM Ṭhalaiin thuziak an sem
ZPM Ṭhalai chuan kum 2022 atana an project 'Zoram Chhanchhuah' an kalpuina kalzelah July 9, Inrinni zing khan Zemabawk bazar, Ṭhuampui bazar leh Bawngkawnah te eirukna a taka do ngam tur sorkâr din a nih theihna atan te, ram rorelnaah dikna tung ding ngam tura thawhhopui atân te leh ram siam ṭha tura thawhpui atâna sawmna thuziak an sem.