MNF party hi he ram tungding tura Pathian ruat a ni - MNF President

MNF chuan July 9, Inrinni khan Lungleia Mizo Hnam Runah inkhawm an buatsaih a, he huna thusawitu MNF president Zoramthanga chuan an party chu Mizoram tungding tura Pathian ruat niin a sawi.

Zoramthanga chuan, MNF chu mi sangtel rual thisena lei tawh a nih thu sawiin, "He ram tungding tura Pathianin a ruat a ni. Hun khirh tak kara beisei phak baka sorkar hmalakna a ropui hi Pathian malsawmna a ni. Pathian remruatna a lo thlen chuan dan theih a ni lo. Kan fel vang ni loin, a duh dan anga kan kal ṭhin avangin a hun takah mal min sawm ṭhin a ni," a ti.

Inthlan hnuhnung bera an khingpui lian ber chu Congress party an nih thu sawiin MNF President chuan, "Pathianin zu a zawrh tir te te a, inthlanpuiah an tla. A tawpah chuan Pu Hawla, Congress dintu anga ngaih, amah leh Congress pumkhat tlat anga ngaih pawh a ban phah hial a ni," a ti a, Congress an len ve deuh loh chuan Serchhip by-election anga an candidate an phatsan leh an hlauh thu a sawi.

MNF President chuan, MNF chu beiseina leh hmathlir nei thui an nih thu sawiin, "A eng zawnga thlir ṭhin party a ni. A din tirh ata, kalphung thlak ve hauh loa Pathian leh kan ram tan tih kalpui ngar ngartu a ni. Kan khingpuiten min sawiselna tur pawh an hre tawh mang lo a, kan hnathawh leh thiltih vangin an chil a put mek a ni," a ti.

Thusawitu dang, MNF adviser Lalchhandama Ralte chuan, an sorkar hnuah Edu­cation department hnuaiah thawktu mi 1,500 chuang lak an nih thu sawiin, "India ram hmundanga an tih theih ve miah loh, hripui leng karah board exam hlawhtling taka buatsaih thei state kan ni," a ti a, zirna-inah Zonunzemawi leh nationalism inzirtirna kalpui a nih tawh thu a sawi.