Kuminah ASF vangin vawk 6,359 suat tawh

Vawk pùl hri, African Swine Fever (ASF) vangin kumin 2022 bikah nimin thleng khan AH&Vety department hriatpuinain Mizorama khua/veng 77-ah vawk 6,359 suat a ni tawh a; sorkar laipuiah vawk suat zangnadawmna dil sak leh an ni dawn. Kum 2021-a ASF vanga vawk suat neitu chhungkaw 2,488-te hnena zangnadawmna pek tur Rs 10,48,42,200 chu bill siam mek a ni.

Kumin bikah Mizorama district 11 zinga 10 - Aizawl, Lunglei, Champhai, Kolasib, Serchhip, Lawngtlai, Mamit, Saitual, Khawzawl leh Hnahthial district-a khua/veng 103-ah ASF hri a leng tih finfiah a ni tawh a, vawk 7,383 a thi tawh. Infected area 103 zinga khua/veng 60-ah vawk 6,136 suat tawh niin, ASF lenna nia rinhlelh (suspected area) khua/veng 72-ah vawk thi 1,540 leh khua/veng 17-ah vawk suat 223 a awm tawh bawk.

District 10-a ASF lênna khua/veng 103 zinga 28 chu Champhai district niin a tam ber a; Mizorama vawk suatna khua/veng 77 zinga 28 pawh Champhai district-a mi a ni.

Champhai district hi Aizawl district in dawtin, ASF lênna khua/veng 27 leh vawk suatna khua/veng 17 a awm mek a; Aizawl district-a ASF infected area 27 zinga 15 chu Aizawl khawpui chhunga veng hrang hrang an ni.

Champhai district-a Farkawn khuaah ASF vanga vawk thi leh suat a tam ber a, vawk 859 thi tawhin AH&Vety department hriatpuinain vawk 1,780 suat a ni tawh.

Saitual district-ah ASF lênna khua/veng pasarih leh rinhleh veng panga awmin, vawk suat a la awm lo a; Siaha district chu ASF hri leng awm lohna hmun a ni mek bawk.

Tarlan tawh angin, July 1, 2022 khan Mizoram sorkara Finance department chuan ASF vanga kum 2021 chhunga vawk suat neitute hnena zangnadawmna pek tur Rs 10,48,42,200 chu AH&Vety department hnenah sanction order a pe a; zangnadawmna hi vawk suat neitu chhungkaw 2,488 hnena pek tur niin, tunah hian AH&Vety department chuan Treasury-a theh luh turin bill a siam mek a ni.