Covid-19 laka in veng turin MPYCC-in mipui an ngen

Mizoram Pradesh Youth Congress Committee (MPYCC) chuan thuchhuah siamin, Mizorama Covid-19 hri kai pungchho leh mek laka inveng fimkhur turin mipuite an ngen.

Mizorama Covid-19 nasa taka a pun leh tak avangin mipuite hri pung mek laka an him tlan zawkna atan leh mahnia an lo inven theihna hrang hrang - face mask uar zawka vuah tur leh hand sanitizer hmang uar lehzual turin Congress Ṭhalai chuan mipui an ngen a, "He hri a hluar laia mahni kan lo in ven tawh ṭhin dan hrang hrang kha hmang thar leh hram hram turin mipuite kan ngen a ni," an ti.

MPYCC chuan, mipui an inven lâwk loh chuan MNF sorkarin Covid-19 laka inven dan a hriat leh thiam chhun lockdown puan bak hmachhawn tur mipuite'n an nei dawn lo nia tarlangin, "Hun rei tak MNF sorkarin lockdown a puan avanga mirethei leh harsa zawkte'n retheih leh manganna nasa tak an tawh ang kha thleng nawn tawh lo se kan duh," an ti a, lockdown puan ngai tawh lo tura inveng turin mipuite an ngen.