Siaha DC-in khua tlawh kim

Siaha district bawrhsap Lalsangliana chuan July 9, Inrinni khan Iana (Ainak) leh Siasi khuate a tlawh a, heti hian Siaha district-a khaw awm zawng zawng a tlawh chhuak kim a ni.

Lalsangliana chuan, Siaha DC a nih ve leha a thil tih tum hmasa ber chu Siaha khawpuia Mizoram sorkar hnuaia office zawng zawng tlawh chhuah leh department hmalak mek leh harsatna te hriatpui a nih thu a sawi a,"Department-te harsatna hi Aizawla an department hmunpuiah ṭheuh thlen sak hi ka tum a ni," a ti a, sorkar pisa a tlawh chhuah vek hnuah Siaha district-a khaw 48-te chu a tlawh chhuak leh ta a ni.

Khaw tina mipui dinhmun a hmun ngeia hmuh hian a chiang ber tih sawiin Lalsangliana chuan,"Khaw tin ka tlawh hian an khaw chanchin leh a mi chengte chanchin ka hriat bakah, an harsatna leh mamawhte a hmunah ngei kal chilha ka hmuhpui hian a chiang ber," a ti a, district mipuite nen pawh inhmelhriatna ṭha tak an neih phah thu leh Siaha district thingtlang khuate tan theitawp chhuaha tum thu a sawi bawk.

Bawrhsap hian Siaha district thingtlang khua tlawhchhuak tur hian ṭum kua a zin chhuak a ni.