Ni hnih chhungin hripui vei 166 hmuh chhuah a ni

Mizoramah Covid-19 vei July 8, Zirtawpni khan mi 61 leh July 9, Inrinni khan mi 105 hmuh chhuah a ni. Inrinni leh nimin khan hripui vei dam tawh mi 63 chhuahtir an ni a; Covid-19 vanga thi an awm lo.

July 8, Zirtawpnia Covid-19 positive hmuh thar mi 61-te hi Aizawl, Lunglei, Serchhip, Mamit leh Hnahthial district aṭanga hmuh chhuah mipa 32 leh hmeichhia 29 an ni a; TrueNat hmanga hmuh pakhat leh RAT hmanga hmuh 60 niin positivity rate 24.11% a tling.

Inrinnia Covid-19 vei hmuh hmuh thar mi 105-te chu Aizawl, Lunglei, Champhai, Serchhip, Mamit, Hnahthial leh Saitual district-a hmuh chhuah mipa 49 leh hmeichhia 56 an ni a; Rapid Antigen Test hmanga hmuh chhuah vek niin, positivity rate chu 28.69% a ni.

IDSP record angin, Mizoramah Covid-19 vei 2,29,775 hmuh chhuah a ni tawh a, mipa 1,06,959 leh hmeichhia 1,22,816 an ni a, mipa aiin hmeichhia 15,857-in an tam zawk. Nimin tlai dar 5 thleng khan mi 2,28,502 (99.45%) chhuahtir an ni tawh a, mi 706 (0.31%) thi tawhin, enkawl mek mi 567 (0.24%) an awm.

Nimin tlai dinhmun angin, Mizorama district 11 zingah Covid-19 positive awm tawh rih lohna district pahnih - Siaha leh Lawngtlai district-te a awm a; positive active case 100 aia tam awmna Aizawl district-ah mi 314 leh Lunglei district-ah mi 138 an awm a, Khawzawl district-ah tlem berin mi pakhat a awm mek bawk.