World AIDS Orphans Day hmang

Nimin kha World AIDS Orphans Day a ni a, Inrinni khan Gan Sabra Society, Aizawl District Child Protection Unit leh World Vision India ten IPR directorate auditorium-ah an hmang a, Aizawl FC president Robert Romawia Royte khuallian a ni.

Robert Romawia Royte chuan, Mizote'n ngaihdan thar leh ṭha zawk an nei zel tih sawiin, Gan Sabra enkawltute'n hmusit leh harsatna an tawh ṭhinte pawh a liam mek tih a sawi a, "Kan hmabakah ngaihtuahna dik leh thil ṭha ti duh ṭhalai an chhuak zel a, chu vanneihna dawngtu zingah Gan Sabra hi ṭang thei zel se tih hi ka duhsakna a ni," a ti.

Robert Romawia chuan, Mizo mipuite chu an hun hman danah fimkhur a, ruihhlo leh mipat hmeichhiatnaa fimkhur a ṭulzia hre thar leh turin a chah a; Odhisa-a chám mek Aizawl FC team-te Aizawla an rawn haw leh hunah Gan Sabra naupangte hun an hman­pui tur thu a sawi bawk.

World AIDS Orphans Day hmannaah hian Gan Sabra, Aizawl DCPU leh World Vision aiawhte'n thu an sawi bawk a; Gan Sabra naupangte'n an thiamthilte an entir a ni.

Report-a a lan danin, Gan Sabra Society hian HIV vei naupang 28 an en­kawl mek a, páwn lam­ah natna khirh bik vei naupang 85 an enkawl mek bawk. Gan Sabra Society-in an enkawl naupangte chu an sikul fee, nutrition leh ṭul dangte an tumsak a ni.