Thil siam tinreng hian nghakhlel takin Congress tlak hun an thlir - Zorama

MNF party chuan May 6, Inrinni khan Hortoki khuaah MNF zawm thar lawm luhna inkhawm an hmang a; MNF president Zoramthanga'n thu sawiin, "Zorama thil siam tinreng hian nghakhlel takin Congress sorkar tlak hun an thlir a ni," a ti.

Zoramthanga chuan, kum 1947-a India independence aṭangin Congress party-in kum 50 chuang India rama ro an rêl chhungin hausa ngai hlir an hausa zual a, retheite an rethei tial tial nia sawiin, "Retheihna hmanga vote-a inlei tlin leh chauh hi an tum ber a ni tih India mipuiin hriain an kham tawh hle a, an hnâwl tawh a ni," a ti a; Congress party chu state hrang hrangah an tla zel niin a sawi.

Mizoramah pawh Congress party hotute'n Hindu sakhaw thil an khawih avangin Kohhran pawi an khawih nia sawiin, Zorama chuan, "Zu an zuar lui a, development a châwl ṭhuap a, Congress sorkar hnuaiah Mizoramah hian thim thuah hnih a thleng a ni ringawt mai," a ti. Congress sorkar chu sorkar hnathawk, kohhran, zirlai leh sumdawngte'n an kham thawh hle nia sawiin, "Congress hian sorkar leh tumin hma pawh an la tawh lo. Pathian leh mipui zarah nakkum inthlanah kan tling ngei dawn a ni," a ti.

MNF President chuan, an sorkar hmasak hun chu 'aitechhin nana hmang' anga sawi ṭhin chungchangah, "Mihring chu dam chhunga in zir tur kan ni. A hma ai khan ka lo upa tawh a, finna leh remhriatna thûk zawk Zoram kai hruai tur hian ka nei tawh," a ti a; Mizoram chu economic independence-a hruai an tum thu a sawi.

MNF thuchhuah chuan, Hortoki-a lawm luhna inkhawmah hian voter 218-te'n MNF-ah membership fee an pe a, an party President-in a lawm lut niin a tarlang.