KHAWTHLIR

Thisen pe
May 6, Inrinni khan Ṭhuampui Bial KTP-te'n Aizawl Civil Hospital tan thisen an pe a, mipa 31 eh hmeichhia pariatte'n unit 39 an pe. Zemabawk Branch KṬP-in an Branch din champha pualin Synod Hospital tan unit 34 an pe a, a petute mipa 31 leh hmeichhia pathum an ni. Diltlang Bial ṬKP pawhin Khawmawi Baptist Kohhran hall-ah Lawngtlai District Hospital tan unit 26 an pe bawk.

Mock drill sawiho
Kolasib District Disaster Management Authority chu an chairman Dr Arun T, Kolasib DC hoin a pisaah May 5, Zirtawpni khan an ṭhu a; Kolasib district-a chhiatrupna a thlen palha insingsak theih dan tur an sawiho.

Tlangzarh dawn
Vawiin chawhnu dar 1 hian Synod Conference Centre-ah Mizo leh Pathian Thu (Festchrift in Honour of Revd Chuauṭhuama on His 70th Birthday) tih lehkhabu chu Synod moderator Rev. Lalzuithanga'n a tlangzarh dawn.

DC-in fang kual
Aizawl DC Kanan Gopinathan chuan May 5-6, 2017 khan Tuisual group YMA huam chhunga khaw hrang hrang a fang a, an dinhmunte a enfiah. DC hian Darlawn, Sakawrdai, Ṭinghmun leh Zohmun khuate bakah, Tuirial Hydel Project siam mek a tlawh a ni. Tuisual group YMA hruaitute chuan, an group huam chhunga Aadhaar card la nei lote tana Aadhaar card siamna turin remchang siamsak turin an ngen.

Scooty chesual
May 6, Inrinni chhun dar 11:30 vel khan Sairang lam aṭanga Aizawl pana tlan Flyte scooty MZ-01 G-6420 chu PTC pêng bul kawng thlangah a tlan liam a, a khalhtu Joe Chinglenba (24) chu a hmunah a thi. Amah hi Imphal mi a ni a, a chhungte'n Assembly quarters, Khatlaah a ruang hi an la a, nimin khan vuiliam a ni.

Library hawng
Muallungthu Branch YMA library building, Raja Ram Mohan Roy Library Foundation (RRRLF) aṭanga sum hmuh hmanga sak thar chu parliamentary secretary KS Thanga, bialtu MLA-in Inrinni khan a hawng. Library building hi Rs. 6,00,000 hmanga sak a ni.

PRISM-in sáwm
PRISM chuan thuchhuah siamin, sorkar laipuiin The Citizenship (Amendment) Bill, 2016 a duan chu a hlawhtlin loh nan political party leh tlawmngai pawl hrang hrang thawhpuiah an sáwm.