CS-in Thenzawla golf course siam mek tlawh

Chief secretary Lalmalsawma chuan May 5, Zirtawpni khan Thenzawl khaw rama Tourism department hnathawh kal lai, ‘Integrated Development of New Eco-Tourism Destination under Swadesh Darshan’ a tlawh.

CS Lalmalsawma hian Tou­rism department hotute leh project consultant Fore Consultants, New Delhi aiawhte a kawm a; hna kal lai mek leh hmachhawp hrang hrangte an sawiho. Chief Secretary Tourism secretary V Lalremthanga, Serchhip DC Sangchhin Chinzah ten an ṭawiawm a ni.

Sorkar thuchhuah tarlan danin, Integrated Development of New Eco-Tourism hi hmarchhak biala tourism a ṭhan zel theihna atana sorkar laipui ruahmanna thar, Swadesh Darshan – North East Circuit hnuaia Mizorama project hmasa ber leh lian ber a ni a; project pumpui chu cheng nuai 9490.96 hû niin, Thenzawl, South Zote leh Reiekahte khualzin hîpna tur hrang hrang siam mek a ni.

Thenzawl Golf Resort siam nan cheng nuai 6448 ruahman a ni a, international standard golf course puitling, kaw 18 nei leh hmun zau tak awh tur siam mek a ni. Golf course hi Canada-a golf course architect firm Graham Cooke & Associates Inc.-in an duan (design) a ni a; resort-ah hian khualzinte riahna tur thing in (eco log hut) 30 sak tur niin, in sakna atan Russia aṭangin Pine Wood thing lak luh a ni a, sa turin Rus­sian mithiamte'n an awmchilh mek.

Chaw eina hmun lian tham tak, food court, inhmuhkhawmna hmun convention centre, pine­wood hmanga sak club house, chawlh hahdamna leh khawthlirna hmun (gazebo)-te siam a ni dawn bawk a; March 2018-ah hawn hman beisei a ni.