Lungleiah zirlai ti ṭhate chawimawi

Lungleia School Education department chuan Inrinni khan Lunglei Convention Centre-ah HLSC 2017-a Lunglei district aṭanga zirlai ti ṭha pathumte chawi­mawina hun an buatsaih a, School Education changtu parlia­mentary secretary Joseph Lalhimpuia'n a hmanpui.

Joseph Lalhimpuia chuan, zirlai ti ṭhate chu an chhuanawm tak zet tih sawiin, an zir zelnaah inthlahdah lo turin a fuih a, "Pawl 10 result hi a tawpna a la ni lo a, a bul ṭanna chauh a ni. A thiam leh hria apiangte dinchanna a ni tawh a, insawipuiin awmzia a nei tawh lo. Nu leh pa thuawihna te, taimakna leh thawhrimna tel lo chuan hlawhtlinna a awm theih lo," a ti.

Integrated Evaluation Scheme (IES) chungchang sawiin Joseph Lalhimpuia chuan, zirlaite mark hmuh a tihsan thu leh inkaihhruaina ṭha tak hnuaia zirlai naupaungte enkawl an nih thu a sawi a; mark hmuh tlem vanga zirlaite'n admission hmuh an harsat ṭhin chu a ziaawm phah a rin thu sawiin, Mi­zorama education system, zirlai kal hmangte leh mark pek dante chu state dangte nena tehkhinin a ṭha hle niin a sawi.

Joseph Lalhimpuia chuan, School Education department-in zirtirtu lakna Recruitment Rules a siam ṭha a, RR thar hmang chuan Science leh Mathematics zirtirtu 34 lak a nih tawh thu a sawi a, "Zirtirtu 111 lak belh tura ruahmanna kalpui mek a ni," a ti.

Parliamentary Sec­retary hian HSLC 2017-a Lunglei district aṭanga top 10-a lang zirlai pathumte chu laptop a pe a ni.