Mamit district-ah thliin in a nuai chhia

May 5, Zirtawpni zan dar 11 leh dar 12 inkar khan Mamit district-a khaw ṭhenkhat chu thlipuiin a nuai a, in chhia eng emaw zat a chhia.

Bungṭhuam V/C resident Zothanmawia sawi danin, Bungṭhuamah hian thlipuiin in pahnih luah tlak lohin a tichhia a, in dang 15 chung leh bangte a tichhiat bakah, Baptist Kohhran sunday school hall, BBEC Kohhran sunday school hall, community hall sak lai beam leh bang, 4th. IR camp-a in pakhat leh santiri duty-na inte a tichhia. Bung-ṭhuam khua kawlphetha pekna transformer a nuai thlu bawk. In chhiate chu Inrinni khan khawtlangin hnatlangin an thawm ṭha a ni.

Kanhmun khuaah chuan chenna in 17 vel a tichhia a, high school chung, Baptist biak-in leh Presbyterian biak-in chungte a tihchhiat bakah, electric ban a chhe nual a ni. Luimawiah pawh thli tleh hian mihring chenna in 10 vel a tichhe bawk.

Thlipui hi kawng neiin a tleh a, hmun hrang hrangah kuhva kûng, ṭhelret kung, hatkora leh thei dang eng emaw zat a tichhe bawk a ni.