Covid-19 vei mek 78 zingah Sipai 64, tualchhung mi 14

Mizoramah Covid-19 hripui vei mi 238 hmuh tawh zinga mi 160-in an vei tawh lo a, mi 78-in an vei mek. Vei mek zinga mi 64 chu sipai mi leh sa an ni a, tualchhung (civil) mi chu 14 chiah an ni.

Mizoramah Covid-19 vei hmuh chhuah tawh zawng zawng chu mi 238 an ni a, mipa 149 leh hmeichhia 89 an ni. Mi 159 (66.81%) chu dam takin enkawlna hmun aṭangin an chhuak tawh.Kolasib district-a hripui vei la awmchhun, hmeichhe pakhat pawhin a vei tawh lo (negative tawh) tih kár hmasa khan finfiah a ni a, chhuahtir a la ni lo a, vawi khat la endik leh tum a nih thu, Kolasib aṭanga thu dawnna chuan a sawi. Heti hian Covid-19 vei negative leh tawh zat chu hriat theih chinah mi 160 an ni.

Covid-19 vei (positive) mek mi 78 (32.77) an la awm a; an zinga mi 64 chu sipai mi leh sate an ni a, tualchhung mi chu 14 (vei tawh zat aṭangin 5.88%) chiah an awm tawh. Tualchhung mi vei mekte hi - Aizawl district pathum, Siaha district paruk, Champhai district pakhat leh Lawng­tlai district pali an awm. Mizorama Covid-19 vei sipai awm zat chu - Aizawl district-ah mi 51 (National Disaster Response Force (NDRF) mi 26, Assam Rifles mi 20, BSF sipai panga), Lunglei district-ah BSF mi leh sa 11 leh Serchhip Dawngzawlah BSF mi leh sa pahnih an ni.