MADC inthlanah Congress an chak ; CEM atan N Zakhai thlan a ni

May 4, 2017-a Mara Autonomous District Council (MADC) inthlanpuia vote tlate chu nimin khan chhiar a ni a, Indian National Congress (INC)-in seat 25-ah seat 17 lain hnehna an chang. INC aṭanga MDC atana thlan tlinte hian chief executive member (CEM) atan N Zakhai an thlang.

MADC inthlana vote tlate hi nimin chawhma dar 10 aṭang khan chhiar ṭan a ni a, chawhnu dar 2:30 velah chhiar zawh a ni. INC hian seat awm zawng zawngah candidate an siam a, seat 17-ah hnehna an chang.

Congress party hnaih bertu MNF leh Mara Democratic Front (MDF) ṭangkawp chuan seat pasarih (MNF 5 leh MDF 2) an la a; independent candidate pakhat tlingin, BJP candidate paruk zingah tling an awm lo.

MADC term liam taah khan Congress party hian seat 15 laiin hnehna an chang a, independent-a thlan tlin mi pahnihte'n a hnuah Congress party an zawm leh avangin MDC 17 an nei. MDF leh MNF ṭangkawp chuan seat pariat an nei a, term hmasa aiin tun ṭumah hian seat an la tlem zawk a ni.

Result puan zawh hian Congress party ticket-a MDC atana thlan tlinte chu Siaha Tourist Lodge-ah an ṭhukhawm nghal a, Congress Legislature Party (CLP) treasurer Zodintluanga kaihhruaina hnuaiah CEM leh Chairman tur an thlang nghal. CEM atan Amobyuh bial aṭanga thlan tlin N Zakhai thlan a ni a, chairman atan Siaha West-II aṭanga thlan tlin H Sahlo thlan a ni.

Tun ṭuma MADC inthlanah hian CEM ni lai RT Zachono chuan Amohtlah bialah MNF candidate HC Lalmalsawma Zasai hneh loin a tla a, chairman ni lai LC Chakhai pawh Siaha East-II ah MNF candidate HC Biakcheuva hneh loin a tla.