CM leh Power Minister an inkâwm

Chief minister Lal Thanhawla chuan nimin khan Union minister of state (independent charge) for Power, Coal, New and Renewable Energy and Mines Piyush Goyal chu New Delhi-a a pisaah a kâwm a, Mizoram kawlphetha dinhmun a sawipui.

Sorkar thuchhuah tarlan danin, Chief Minister hian kawlphetha meagawatt 24 pe chhuak thei tur Turini Small Hydel Project chu state project anga kalpui a nih theihna atan theihtawp chhuahpui turin Power Minister a ngen a; ministry-in small hydel project atana subsidy an pek mek chu a tlem tih sawiin, hei hi megawatt khat zel angin pek ni se tiin rawtna a siam.

CM Lal Thanhawla rawt­na hi Union minister Piyush Goyal chuan ministry-in a lo en zui tur thu a hrilh.

CM Hawla chuan, ni zung (solar) hmanga kawlphetha siam chu kawlphetha thiang­hlim a nih avang leh Mizoramin ni êng a hmuh ṭhat avangin Mizoram sorkarin a ngaih pawimawh thu a sawi a, "Solar Power Policy pawh hman theih turin Mizoram sorkarin a ruahman tawh a ni," a ti.

JICA ṭanpuinain Then­zawlah kawlphetha megawatt 10 pe chhuak thei tur Solar PV Plant siam a nih theih nan Ministry of New & Renewable Energy-ah dilna thehluh a nih tawh thu sawiin Lal Thanhawla chuan, project ṭan vat a nih theih nana ṭulte chu ministry lamin JICA-ah buaipuisak turin a ngen a, "Megawatt 10 pe chhuak thei Solar Power Plant dang pawh hmun remchanga Solar Power Policy zulzuiin sorkarin bun a duh," a ti.

Piyush Goyal hian Mi-zo­ram mamawhte a hmuna enfiah turin High Level Dele­gation a tirh tur thu Chief Minister a hrilh a ni.