KHAWTHLIR

NEET 2017
MBBS leh medical course dangte zir tur thlanna, National Eligibily cum Entrance Test (NEET) 2017 exam chu May 7, Pathianni khan India ram pumah neih a ni a, Mizoramah pawh Pachhunga University College leh Kendriya Vidyalaya-ahte buatsaih a ni. NEET 2017 hi Mizoram aṭangin zirlai sang khat chuang hretin an bei nia thu dawn a ni.

Zirlai chawimawi
Aizawl SP Lalhuliana leh a thawhpuite chuan nimin khan Aizawl district chhunga HSLC 2017-a top 10-a tling mi 11-te chawimawina hun, Aizawl PS leh Bawngkawn PS-ah an buatsaih a, lawmpuina thilpek an hlan. Police-te chuan, zirlaite chu theihtawp chhuah chhunzawm zel turin an chah.

HoD thar
Mizoram sorkar chuan tun hnai khan officer paruk an hna aṭanga kaisangte chu head of department (HoD)-ah a dah thar. HoD tharte an awmna department-te chu - Excise & Narcotics commissioner-ah Ngurchungnunga Sailo, SCERT director-ah Laldawngliani Chawngthu, Sericulture director-ah Lalrozama, Taxation commissioner-ah LH Rosanga, Tou-rism director-ah Biakthanmawia leh Social Welfare director-ah Dr Lalnunthara te an ni.

Luiah tla hlum
May 7, Pathianni chawhnu lam khan Tlawng lui Reiek kaiah Tuikual South veng mi pahnih - F Lalchhandama (18) s/o F Lalmalsawma leh C Lalremkima (16) s/o C Lalngaihawma te an tla hlum.Thu dawn danin, Tlawng luiah hian C Lalremkima a tla a, a ṭhianpa F Lalchhan-dama'n chhan a tum a, chhan a tumna lamah a tla ve leh a ni. An pahnih hian an tlakna aṭanga lui mawng lam metre 20 velah Pathianni vek khan an ruang hmuh a ni.

Khapna sût
Champhai Sub Divisional Magistrate chuan thuchhuah siamin, motor aṭanga bungrua hlan thlak leh motor-a hlan chungchangah, boruak a dai tawh tih hriat a nih avangin April 12, 2017-a Zokhawthara bungraw lak luh, thawn chhuah, hlan leh hlan thlak khap chu May 8, 2017 aṭangin sût a nih thu a tarlang.