Hmasawnna hna thawh ṭhat vangin Congress party kan tling - Zodintluanga

MADC-ah Congress party-in sorkar thar an siam thei dawn tih a chian hnuah nimin khan Congress Legislature Party (CLP) treasurer Zodintluanga chuan, hmasawnna hna an thawh ṭhat vang leh mipuiin Congress an rin avangin MADC-ah Congress party-in term thum sorkarna an siam dawn ta tih a sawi.

Zodintluanga chuan nimin khan MADC-a CLP hruaitu turte a thlanpuinaah thu sawiin, "Term thumna atana hnehna kan chang leh thei hi Mizoram leh Mara rama sorkarin hmasawnna nasa tak a thlen vang a ni a, Pu Lal Thanhawla kaihhruai Congress party hian minority a ngaihsak em em vang a ni bawk," a ti.

Mara mipuiin Congress party-ah rinna an nghah avanga lawmawm a tih thu sawiin Zodintluanga chuan, "He hnehna sang tak hi Pathian kaih­hruaina leh Mara mipuite'n Cong­ress party-ah rinna in neih tlat vang a ni," a ti a; Siaha district chhunga hmasawnna thleng chu thil chhin­chhiah tlak a nih thu a sawi.

Mizoramah state sorkarna term thum chelh theih a nih thu sawiin Zodintluanga chuan, India ram hmarchhak state hrang hrang, kan chhehvelah pawh term thum chuang sorkarna chelh theite an awm tih a sawi a, "MADC lama term thum kan sorkarna hian Mizoram state-ah pawh term thum sorkar theih a ni tih a tichiang," a ti.

CLP Treasurer chuan, Siaha khawpui chhunga MDC bial pariat awmah Congress party-in bial paruk an la thei chu khawpui mite'n Congress Party-ah beiseina leh rinna an nghat tih tilangtu a nih thu a sawi bawk.

Inkhawmah hian minister PC Lalthanliana pawhin thu a sawi.