Mamit-a zeng hri danna pek dan sawiho

Mamit DC Lalbiaksangi hoin nimin khan DC pisa conference hall-ah Mamit District Task Force on Immunization an ṭhu a; Intensified Pulse Polio Immunization (IPPI) second round leh Mission Indradanush (MI) fourth phase third round an thlirlet bakah, MI fourth phase fourth round neih tur an thlir lâwk.

IPPI second round-ah hian Mamit district-a khaw 117-ah naupang kum 5 hnuai lam 10,237 hnenah hri danna pek a nih thu an tarlang a, chu chu an target aṭangin 96.4% a ni. Meeting-ah hian hri danna pekna kawnga an harsatna tawhte leh hri danna pek leh huna hlawhtlinna ṭha lehzual an hmuh theih dan tur sawiho a ni.

Mission Indradanush fourth phase third round-ah nausen kum 2 hnuai lam mi 59 hnenah hri danna pek niin, chu chu target aṭangin 87% a ni a; nu nau pai mek 25 hnenah hri danna pek niin, chu chu an target aṭanga 83% a ni thung.

MI fourth phase fourth round-ah chuan Mamit district-a khaw pasarih - Dilzawl, Zomuantlang, Khantlang, Belkhai, Hnahva, Silsuri East leh Silsuri West-ahte naupang kum 2 hnuai lam 55 leh nu nau pai mek 28 hnenah hri danna pek tum a ni.

Mamit District Task Force on Immunization meeting-ah hian Mamit Chief Medical Officer, District Hospital-a Medical Superintendent, Senior Medical Officer, Mamit Joint V/C hruaitute leh tlawmngai pawl hruaitute an tel.