RT-PCR Health Minister leh eptute'n sawifiah

Congress Legislature Party (CLP) leader Zodintluanga Ralte chuan Lunglei Civil Hospital-a dah turin RT-PCR khawl a chah thlen chu June 26 khan Lunglei DC hnenah a hlan a, Lunglei DC lam hian Lunglei Civil Hospital-ah an pe a; nimahsela damdawi-in thuneitute hian an kawl a remchan loh thu sawiin Lunglei DC office-ah an kir leh a ni.

Zo Peoples' Movement (ZPM) Legislaturte Party leader Lalduhoma hian June 1 khan RT-PCR hawh chawp kan hman avangin RT-PCR pek a duh thu sorkarah a thlen a; nimahsela sorkarin ruahmanna dang an nei tiin an chhang a, a pe ta lo a ni.

Health Minister chuan, ZMC laboratory-ah swab sample test tura dawnte an endik kim thawkhat thu sawiin, "Lungleia TrueNAT khawl hmanga swab sample test pawh tluang takin kalpui zel a ni. Chief Minister ruahman angin district tinah TrueNAT Quattro dah a ni dawn. Mi ṭhahnemngaiten RT-PCR khawl an donate duh thu sorkarah an rawn thlen ṭhin a, inthlahrung taka kan hnar a ngai ṭhin a ni," a ti.

RT-PCR khawl chu lei mai theih pawh ni se, a kháwl mai bakah ken tel tam tak a nei tih sawiin R Lalthangliana chuan, "Mithiamte chhût dan chuan khawl bun tur hian RT-PCR khawl cheng nuai 20 man vel chhût telin a vaiin nuai 100 vel sèn a ngai," a ti a; RT-PCR chu medical college, university, science college leh central research institution laboratory neiahte dah mai theih a nih thu a sawi.

Dr R Lalthangliana chuan, Indian Council for Medical Research (ICMR)-in institution-based ni lo, damdawi-in emaw, hmun dangah emaw RT-PCR khawl bun tur chuan ni khatah sample 100 test ziah tur tih dan a nei niin a sawi a, "Sample test tura bâwlhlo ngai zawng zawng nen ni khata sample 100 test-na man hi Rs. 7,00,000 vel a nih thu mithiamte'n an sawi. Hetianga ni tin test theih loh chuan ICMR hian test kalpui phalna licence an tihtawpsak ṭhin," a ti.

Health Minister sawi danin, RT-PCR dahna tur laboratory siam a hautak em em a, a enkawltu tur doctor, scientist leh laboratory technician bakah, mi dang ṭhahnem tak a mamawh. Full time-a vil tur chuan ZMC laboratory-a khawl pakhat pawh mi 25 velin an buaipui a ngai.

District tina dah tur TrueNAT Quattro chu RT-PCR khawl tluk thoa ṭha a ni a, senso hautak lo zawk, ICMR pawhin a phal a ni. Chutiang kháwl hmang chuan ni khatah sample 45-50 vel endik theih a nih bakah, test nan darkar khat vel bak a ngai lo. Covid-19 bakah natna dang tam tak endik theih a ni.

Health Minister chuan, Covid-19 bikah sample test tur hlâwm lian endik zawh a nih tawh thu sawiin, "Quarantine facility hrang hrangte pawh a ruak ṭan mek zel a, tangkhang lo haw tur an tlem tial tial a, sample test hna pawh a hautak lo chho zel dawn," a ti a; Lawngtlai, Saitual leh Hnathial district-te chu Covid-19 vei awm lohna district-ah puan theih a nih thu a sawi.

Covid-19 vei an dam chhoh zel thu leh vei thar hmuh chhuah a tlem telh telh thu sawiin R Lalthangliana chuan, "Amaherawhchu, he natna hian min kiansan mai dawn lo tih kan hriat a ngai. India ramah tukin thlenga Health Ministry record-ah Covid-19 vei nuai 5 kan tling tawh a, khawvel pumah a vei tam palina kan ni mek. Thlamuang taka awm ngawt theih a ni lo," a ti.

Health Minister chuan, Assam pawh an thlamuang sual deuha hriat a nih thu sawiin, "A bik takin Guwahati-ah phei chuan June 29 aṭanga kar hnih chhung chu total lockdown an neih a ngai dawn. Hei hi a chhan chu, June 15-25 inkar lek khan Guwahati bikah positive 762 hmuh a ni a, an zinga 677 (88.84%) chu travel history nei lo an ni," a ti a; Mizoramah pawh kua a hreuhna tur hriat a nih loh thu a sawi.

ZLP leader Lalduhoma chuan, June 1, 2020 khan Mizoram sorkarah RT-PCR kháwl pek a duh thu a thlen tih sawiin, "Khatih lai khan mi khawl hawh chawp pakhat chiah a awm a, test tur a tam si a, an test chak thei si lo. Sorkar anga lei dawn chuan a process a thui an ti bawk si a, ka mangangin sorkar ka offer a, ni sarih chhunga ka chah thlen theih tur thu pawh ka hrilh. Mahse, an pawm duh lo," a ti.

Lalduhoma chuan, sorkarin Covid-19 dona atana thilpekah pawisa khera dawn an châk nia a hriat thu sawiin, "Kan hlawh leh fund-te pawisaa kan thawh chuan an pawm lawi si. Kutdawh lo kal se, chaw leh ei tur dang pek tum ila, pawisa kher phût se, chu nen chuan a inang reng a ni," a ti a; ramin harsatna a tawh lai hian eptu leh rorel lai tih lam ngaihtuah loa ṭan rual hun a nih thu a sawi.

Amah leh Zodintluanga thilpek chu sorkarin pawmin, lawmthute sawi lêt se sorkar a hmingṭhat phah zawk tur thu sawiin Lalduhoma chuan, "Hun harsa kan tawh lai hian kan tel ve leh kan ṭawiawm hi an duh lo em ni tih hi ka zawhna a ni," a ti.

ZLP Leader chuan, Covid-19 vangin ICMR-in rules leh regulation a neihte a thlahdul vek tih sawiin, "RT-PCR khawl run (nei/hmang) turin a harsatzia leh a kaihhnawih tamzia an sawi a, Vety College khawl hawh chawpin an test thei tho si. RT-PCR ka offer hnuah pawh khawl dang pahnih an dah belh a, an run zel thei tho a ni," a ti a; sorkar ta liau liau tura a offer sorkarin a pawm lo chu mak a tih thu a sawi.

Laboratory din harsatzia sorkarin a sawi ṭhin chu laboratory puitling (VRD laboratory) an sawina a nih chuan a pawm thu sawiin Duhoma chuan, "VRD laboratory hi Mizoramah tunah pawh kan nei lo. Hemi dinna tur atan hian RT-PCR hi khawl awm ngai zinga pakhat a ni," a ti.

Lalduhoma chuan, April 2020 khan National Health Mission (NHM)-in state leh union territory-te tana ruahmanna a neihte an thawn tih sawiin, "Medical equipment mamawh angte leiin laboratory din tum turin a ti a, a senso pawh 100% an tum tur a ni," a ti a; NHM hun tiam a liam hmain Mizoram sorkarin Aizawl chauh ni lo, Lungleiahte laboratory din tum se ṭha a tih thu a sawi.

CLP leader Zodintluanga Ralte chuan Vanglaini palai zawhna chhangin, RT-PCR a leina chhan ber chu - sorkarin March thla daiha a order tawh a lo la thlen theih si loh vang a nih thu a sawi a, "Sample la test hman loh (backlog) a tam si a, Lunglei leh chhim lam district dangte test zung zung a nih theihna atan kan lei a ni. Táwngpáwng lei ngawt kan ni lo a, mi tam tak kan ráwn a ni," a ti.

Zodintluanga Ralte chuan, Lung­lei Civil Hospital (LCH)-a laboratory awm mek chu RT-PCR dahna turin chei ṭhat a harsat loh thu sawiin, "Mithiam tam tak ka ráwn ve a, thla ruk ngai loin, sorkarin a phal phawt chuan chawlhkar hnih chhungin RT-PCR dahna tur kan peihfel theih kan inbeisei," a ti a; sorkarin a remtih chuan hmalak ṭan nghal an inhuam reng thu a sawi.

Mizoram sorkar chu RT-PCR nei loin, mi ta hawhin hun rei tak a awm tih sawiin Zodintluanga chuan, "Sorkarin 'Ṭanho hun lai, inbeih hun a ni lo e' an tih laia sorkar kan puih ve theihnaa ngaia RT-PCR kan lei hetia an ti leh si hi chu mi mit kan timîm deuh em ni ka ti. A harsatna ringawt sawi loin, RT-PCR dah theih dan tur an zawng zawk turah kan ngai," a ti.

Zodintluanga chuan, "Kan inkhung reng thei dawn lo a, kal khawm leh pun khawm hunte a la awm ang. Chu'ngah chuan Covid-19 vei an awm palh hlauh chuan mipui hian TrueNAT Quattro ni lo, RT-PCR ngeia endik an duh dawn. Covid-19 vang hian eng chen nge kan buai dawn tih leh kan buai dan tur kan hre lo. Chuvangin, RT-PCR lo neih tam hi a ṭha a ni," a ti a; RT-PCR chu Covid-19 atan kher lo pawh a ṭangkai thu a sawi.