Eirukna haw loah CM Hawla puh

MNF vice president R Tlanghmingthanga chuan, MNF party leh mi dangte'n RTI Act hmangin Congress sor­kara eirukna chungchang an au chhuahpui fo a, mahse sorkarin a bawhzui ṭha duh lo ṭhin niin a sawi a, "Hei hian Pu Hawla'n hlemhletna a huat lohzia a tilang," a ti.

Nimina Mizo Hnam Runa inkhawmah thu sawiin R Tlanghming­thanga chuan, "Congress president Lal Thanhawla’n 'MNF-in Congress sorkara minister-te’n an eiru tih sawi tur an hre lo’ tih a sawi ṭhin hian MNF-te hi corruption vengtu leh ngai­mawhtu berah a ngai nge, a hnuaia minister-te leh officer-te'n a ruka an eiruk hem hem laiin, corruption hawtu leh vengtuah a inngai lo niin a lang," a ti a; Chief Minister chu eirukna haw tak tak loah a puh.

R Tlanghmingthanga chuan, lottery-a cheng vbc. sing chuang tih­chingpen thu CAG report-a tarlan te, Mizo Carbon tih hminga document phuahchawp hmanga sum tam tak lak chungchang te, LEIT Minister leh MYC Chairman bân chungchangte a sawi lang a; chungte chu CM Lal Thanhawla'n a bawhzui ṭha duh lo nia sawiin, "Lai, Mara leh Chakma district-a sum tam tak chingpen a bawhzui duh lote hian corruption a haw tak tak lo tih a tliang chiang a ni," a ti.