Mamte Primary School hawng

Lunglei district-a Mamte Primary School-a, zirtirtu pahnih chauh an awm vanga khawtlangin April 4, 2017 aṭanga sikul an khâr chu nimin aṭang khan an hawng leh ṭan.

Mamte P/S-ah hian zirlai 103 awmin, zirtirtu pahnih chauh an nei a; hei vang hian khawtlang chuan zirtirtu dah belh phûtin kumina sikul hawn ṭan ni hmasa ber aṭangin sikul an khâr a ni.

Khawtlang hruai­tute leh MSU sub-headquarters, Lunglei hruaitute'n tun hnai khan parliamentary secretray (School Education) Joseph Lalhlimpuia chu a chenna inah hmuin, an harsatna tawh mek chu an sawipui.

Joseph Lalhimpuia chuan, sikul khâr mek chu titawp a, zirlai naupangte chu sikul kaitir phawt tur­in a lo hrilh a; zirlaite'n zirna an ṭan phawt chuan zirtirtu pek belh ngei an nih tur thu a sawi.

Parliamentary Secretray thuràwn ang hian Mamte kawtlang chuan nimin aṭang khan sikul an hawng ṭan a, May 2017 chhung sorkar ngaihchân an tum a ni.