CM Relief Fund sem chhuak Pamphlet print nan nuai 10.53 Pawisa hman loh nuai 825 la awm

Covid-19 dona atana Chief Minister's Relief Fund-a sum tlingkhawm aṭangin June 26, 2020 khan Rs. 18,54,640 pek chhuah leh a ni a; chu'ng zingah chuan Covid-19 awareness pamphlet siamna (print man) senso Rs. 10,53,000 a tel.

Committee on Utilization of CM Relief Fund for Covid-19 hotute ṭhukhawmin a rêl angin CM Relief Fund aṭangin June 26 khan Rs. 18,54,640 pek chhuah a ni a; sum pek chhuahnate chu a hnuaiah tarlan a ni.

June 26, 2020-a sorkar thuchhuah tarlan danin, June 26 thlenga CM Relief Fund for Covid-19 sum báwma pawisa lut tawh zat chu cheng nuai 1870 a tling tawh a; cheng nuai 1045 hman tawh a ni a, la hman loh cheng nuai 825 vel a la awm tihna a ni.

CM Relief Fund hman dan tur hi Chief Secretary kaihhruai Committee on Utilization of CM Relief Fund for Covid-19 in an rél ṭhin a, Committee-in hmanna tura a tihahte Chief Mi­nister's Office (CMO) chuan pawisa an pe chhuak ṭhin.

Vanglaini palaiin a biaknaah CMO-a thawkte chuan, CM Relief Fund chu lang­tlang taka hman a nih thu an lo sawi tawh a, "Sum kan hman dawn apiang­in IPR department kaltlangin kan puangzar zel a, a hmanna pawh IPR kaltlang thoin kan puangzar ṭhin," an ti.