IMA-in economy leh himna ngaihtuah kawp ṭha an ti

Indian Medical Association (IMA), Mizoram Branch president Dr Rosangluaia chuan, inkhàrkhip chungchangah ram economy ngaihtuah loh theih a nih loh thu a sawi a, "Chutih rualin, Covid-19 laka kan him zelna tur pawh ngaihtuah a ngai," a ti.

Dr Rosangluaia chuan, Mizorama Covid-19 vei hmuh chhuahte chu quarantine centre-a mi deuh vek an la nih zel avangin uluk taka enkawl an nih chuan mipui náwlpui chu an hima ngaih theihna chin a awm thu sawiin, "Chutih rualin, thil thleng thut thei a ni. Kan state ṭhenawm velah a la darh nasa hle a, India ram pum anga chhût pawhin a vei hmuh chhuah an la tam hle," a ti a; Covid-19 awm hma anga nunphung pangngaia khawsak a la ngamawm loha an ngaih thu a sawi.

A bik takin ramri lam uluk taka vèn reng ṭul an tih thu sawiin IMA President chuan, "Inkhàrkhip chungchangah hian mi harsa zawk leh ni tin eichawp zawngte ngaihtuah loh thei a ni lo. Doctor lam pawhin an dinhmun kan ngaihtuah a, sorkar pawhin a ngaihtuah. A him tâwk ngaihtuah chunga inthlahdul deuh chu a ṭha. Chutih rualin, kan inthlahdul lutuk chuan mipui kan thla a muang hma thei si a, fimkhur viau zel a ṭul a ni," a ti.