Mizorama Covid-19 vei hmuh chhuah Mi 151 zinga 112-in an vei tawh lo
Zoram Medical College (ZMC) Covid-19 Laboratory-ah June 26, Zirtawpnia swab sample endik zingah Covid-19 hripui vei pakhat hmuh chhuah a ni a, June 27, Inrinnia endikah hripui vei pathum hmuh chhuah leh a ni bawk. Heti hian Mizoramah Covid-19 vei mi 151 hmuh chhuah a ni tawh a, chu'ng zinga mi 112 (74.17%) chuan an vei tawh lo (negative) a, mi 39-in an la vei mek.
June 27, Inrinni khan Siaha district mi Covid-19 vei tawh lo pariat - mipa pathum leh hmeichhia panga (naute telin)-te chu Covid care Centre (CCC) aṭangin chhuahtir an ni a; chutih rualin, chhungkaw pakhata member palite chu an ina inkhung zui rih turin hmun a remchan loh avangin ni sarih dang CCC-ah an awm zui dawn. June 26 khan Mamit district-a hripui vei zinga mi pakuate chuan an vei tawh lo tih hmuh chhuah a ni bawk.
Mizoramah Covid-19 vei hmuh chhuah mi 151 an awm tawh a, chu'ng zinga mi 112 chuan an vei tawh lo (negative) tih swab test nawnnaah a lang a, vei mek mi 39 an awm. Vei mek zinga mi 20 chu SRH-ZMC-ah enkawl an ni a, mi dang 19-te chu an district ṭheuhah enkawl an ni.
Covid-19 vei tawh lo zinga mi 55 an chhuak tawh a, CCC / Dedicated Covid Health Centre (DCHC)-ah mi 57 an la awm. Chhuah tawhte chu ZMC aṭanga chhuak mi 34, Champhai aṭangin pali, Khawzawl aṭangin pakhat, Lawngtlai aṭangin pariat leh Siaha aṭangin pariat an ni.
Covid-19 vei tawh lo, CCC/DCHC-a la awmte chu Lungleiah mi 46, Serchhipah mi pahnih leh Mamitah mi pakua an ni. Hetih lai hian, ZMC aṭanga chhuahtir tawh pakhat chu Serchhipa CCC-ah awmtir leh rih a nih thu, Serchhipa sorkar official-te aṭangin dawn a ni.+
SRH-ZMC Bulletin June 27-a chhuakin a tarlan danin, June 26-a ZMC, Aizawl, Champhai, Lawngtlai, Mamit, Khawzawl leh Siaha district aṭanga swab sample dawn an endik 117 zingah mi pakhatin Covid-19 a vei a, mi dang 116 an fihlîm. Hripui vei pakhat hi Champhai district mi, Delhi aṭanga haw, khung hran lai a ni a, Champhaia CCC-ah a awm zui ang.
June 27-ah swab sample endik 125 zingah Covid-19 vei mi pathum hmuh chhuah a ni a, mi 122-in an vei lo. Covid-19 positive hmuh thar pathumte hi Delhi leh Maharashtra aṭanga haw, Mamit district mi pahnih leh Aizawl district mi pakhat an ni a; Mamit district-a mite chu Mamita CCC-ah enkawl an nih laiin, Aizawl district-a mi chu nimin khan SRH-ah dah luh a ni.
SRH-ah hian June 27 khan SRH-ah damlo pakhat dah luh a ni a, Holding Ward-ah dah a ni. Nimin khan Covid-19 vei rinhlelh pakhat dah luh a ni a, ICU-ah enkawl nghal a ni.
Nimina chhuak SRH-ZMC Bulletin-in a tarlan danin, SRH-ah hian Covid-19 vei mi 20 - mipa paruk leh hmeichhia 14 enkawl mek a ni a, harsatna lian an nei lo. SRH-ah Covid-19 vei mi 54 admit tawh a ni a, mi 34 chu damin an chhuak tawh.