NHM-a thawkte a huhoin an châwl ṭan ; Covid-19 vangin sorkarin nawrh a khap

National Health Mission (NHM), Mizoram hnuaia thawkte chuan sorkara an thil phût hrang hrang ti puitling tura sorkar kar nan nimin aṭang khan a huhoin chawlh an la ṭan. Hetih lai hian, Mizoram sorkar chuan Covid-19 léng avangin Health department hnuaia thawkte lungawi lohna lantir a khap.

Tarlan tawh angin, NHM Employees Union, Mizoram (NEUM) chuan a hun taka hlawh lâk, medical reimbursement neih ve, transfer travelling allowance neih leh Health department-in hna a lakah NHM contractual staff-te tana hamṭhatna neihtirte an phût a ni.

An thil phûtte tihlawhtling tura phûtin NHM hnuaia thawkte chuan nimin khan a huhoin chawlh an la ṭan a, ruahman lâwk dan chuan vawiin leh naktukah pawh an chawl leh dawn.

Hetih lai hian, Health department chuan July 8, 2022 khan hriattirna (notification) chhuahin, Mizoram Essential Commodities Maintenance Act, 1990 tlawhchhanin, Covid-19 avangin thla ruk chhung lungawi lohna lantir khap a nih thu a puang.

Health department hriattirna zâwm lote chu Mizoram Essential Commodities Maintenance Act hmangin hrem theih an nih thu tarlan a ni a; department leh pisaa hotute chu dan kengkawh tura hriattir an ni.

Essential Commodities Maintenance Act chungchangah hian NEUM hruaitute chuan, Supreme Court-in order a neih thu sawiin, "Hlawh ṭha takin an la tur a ni, tih a ni a, sorkar pawhin tih tur a nei ve. Tunah hian thla thum chhung hlawh kan la tawh lo a, thla li hlawh la tawh lote pawh an awm," an ti.

NEUM hruaitute aṭanga Vanglaini thu dawn danin, ni thum chhung chawlh an lâk avangin doctor ṭhenkhat chu an khuaah an haw a, upper primary health centre (UPHC)-te chu khâr deuh vek a ni. District damdawi-ina mi zai theih lohna hmunte pawh a awm. Tunlaia Covid-19 buaipuitu ber pakhat IDSP pisaah pawh NHM hnuaia thawk an tam avangin nimin khan khâr a ni.

NEUM chuan thuchhuah siamin, NHM-a thawkte chu thingtlang kilkhâwr tak taka awm turte'n contract-a chhawr an nih thu an tarlang a, "Khawpui zawka awmte pawh an awm tho. Chhungkaw châwm nan hlawh tlemtêtê kan neih ve chu rei tak tak batsak kan ni. Naupang sikul fee bat a ngai a, in luah man bat a ngai a, loan late rinawm lo nih kan hlawh. Pathian ram thlengin bat a ngai ṭhin," an ti.

Hlawh lâk loh avang hian ni tina an hnathawhte thawh tlem theih a ni chuang lo tih tarlangin NEUM chuan, "Hna a pung telh telh zawk. Kan thawh hlawh hi a hun takah min pe se, Study Group thutlukna hi chu hlawh nei chungin kan nghâk thei," an ti a; an thil tawn chu lungawi lohna lantirna thama an ngaih thu an tarlang.

NHM hnuaia thawkte hi doctor, nurse, health worker, laboratory technician, pharmacist, data entry operator leh thawktu dangte an ni a; an vaiin mi 2,200 vel an ni.

NEUM hian tuna an thil phût ang bawk phûtin nikum (2021) December 17 aṭang khan tiam chin awm loin an lo châwl tawh (mass casual leave an la tawh) a, December 20 zingah an titàwp. Hemi ṭum pawh hian Health department chuan Mizoram Essential Commodities Maintenance Act, 1990 tlawhchhanin December 19-ah nawrh khapna thupek a lo chhuah tawh a ni.