SEDP sem thawh khatnaah Dawngtu tur zatve pek tum

SEDP Governing Board chu chairman Zoramthanga, chief minister kaihhruaiin nimin khan CMO Conference Hall-ah an ṭhukhawm a; SEDP hnuaia ṭanpuina sum chhungkuaa sem tur chu a thawh khatnaah constituency tina a dawngtu tura thlan zinga a zatve (50%) hnenah pek a, a bak zawng chu thawh hnihnaah pek turin an rél.

SEDP Governing Board ṭhutkhawmah hian family oriented SEDP programme tlangzarhna state pum leh district tina buatsaih thuai an rél a; state pum huapa tlangzarh hnuah a tahtawlin district-ah hawnna hun hman ni se, an ti.

Chhungkaw hnena SEDP hnuaia ṭanpuina sem tur chu a thawh khatna (first installment)-ah Assembly constituency tina a dawngtu tur thlan chhuah aṭangin 50% hnenah ṭanpuina sum sem ni se, an ti a; a thawh khatnaa la dawng lo zawng, a zatve dang hnenah a thawh hnihnaah sem leh turin an rél a ni.

Sorkar thuchhuah tarlan danin, ṭanpuina sum dawngtu turte hnena pawisa pek chu a kaihhnawih department-te mawhphurhna a nih angin, an district office ṭheuhte kaltlanga pe chhuak turin department-te tih an ni a; department district office-te chuan an awmna District Level SEDP Committee hriatpuinain hma la se, an ti bawk.