Covid-19 positivity rate san ber ní a thleng

July 10, Pathianni khan Mizoramah Covid-19 vei mi 87 hmuh chhuah a ni a, swab sample endik zinga a zatve aia tam positive in, positivity rate a san ber ṭum a ni. Nimin khan hripui vei dam tawh mi 33 chhuahtir an ni a, Covid-19 vanga thi an awm lo.

Pathiannia sample 177 endik aṭanga positive hmuh zat 87 chu 49.15% a tling a, Covid-19 lèn tirh aṭanga Mizorama positivity rate a sàn ber ní a ni. Lunglei district-a sample 52 endik zingah positive 49 (94.23%) an awm. A hmaa positivity rate san ber ní June 20, 2021 khan 47.53% a ni a; June 30, 2022 khan 45.67% a tling bawk. Tun July thla chhungin ni 2 leh ni 5 tih loh ni dang zawngah chuan positivity rate 20% aiin a la sang vek a ni.

July 10, Pathiannia Covid-19 positive hmuh hmuh thar mi 89-te chu mipa 35 leh hmeichhia 52 an ni a, Rapid Antigen Test hmanga hmuh chhuah vek niin, endikna dang hmangin swab sample endik a ni lo. Mi 89 zinga 36 chu Higher and Technical Institute of Mizoram (HATIM), Lung­leia mite an ni a, Kolasib district-a Bûkpui khaw mi 12 an awm bawk.

IDSP record angin, Mizoramah Covid-19 vei 2,29,862 hmuh chhuah a ni tawh a, mipa 1,06,994 leh hmeichhia 1,22,868 an ni a, mipa aiin hmeichhia 15,874-in an tam zawk. Nimin tlai dar 5 thleng khan mi 2,28,535 (99.42%) chhuahtir an ni tawh a, mi 706 (0.31%) thi tawh­in, enkawl mek mi 621 (0.27%) an awm.

Mizoramah hripui vei enkawl lai an pung zel a, nimin khan kumin April 13 hnua actuive case tam lai ber a thleng chho leh tawh. Nimin tlai dinhmun angin, Mizorama district 11 zingah Covid-19 posi­tive awm tawh rih lohna Lawngtlai district chiah a awm tawh. Positive active case tamna ber Aizawl district-ah pung zelin, mi 288 an awm tling tawh a, Lunglei district-ah 166 an awm bawk.

Kum 2011 chhiarpuia mihring awm zat aṭanga chhûtin Mizorama Covid-19 positive hmuh tawh zat 2,29,862 chu 20.95% a tling. Mi 1,000 zel­­ah positive 209 an awm tawh ang a ni a, mi 1,00,000 zelah hripui vangin mi 64 an thi tawh ang a ni.