CSS hnuaia hnathawhte thlirho

Siaha District Develop­ment Coordination & Monitoring Committee/ DISHA chu an chairman C Lalrosanga, Lok Sabha MP kaihhruaiin nimin khan an ṭhukhawm a, sorkar laipui sum hmanga nikum chhunga hnathawhte leh kumina hmachhawpte an thlirho.

C Lalrosanga chuan, DISHA meeting chu tih dik loh zawn chhuahna a nih loh thu sawiin, "Centrally sponsored scheme (CCS) line department-te'n sorkar laipui scheme pawimawh tak takte ṭha taka an kalpui thei nan te, harsatna an neih leh an hmasawnna chinte inhriatpui tawna thawhhona ṭha neih theihna tur sawihona a ni," a ti a; sorkar department hrang hrangte chu hunbi ruata an hnathawh zo hman turin a chah.

Ṭhutkhawmah hian CSS thawk/khawih department-te'n an hmalakna leh an hmachhawp te, an harsatna tawhte an sawiho bakah, rawtna an neihte an thlen a; Siaha district-a MLA KT Rokhaw, MADC chief executive member H Malvina leh chairman N Viakhu, bawrhsap Lalsangliana leh mi pawimawh dangte an tel a ni.